މީހަކު ހައްޔަރު ކުރުމުގައި, ހާލަތާއި ނުބައްދަލު ބާރުގެ ބޭނުންކޮށް، ފުލުހުން އެމީހާއާމެދު އަނިޔާވެރި ގޮތަކަށް އަމަލު ކުރިކަމަށް ބެލެވޭ ވީޑިއޯއެއް އާންމުވުމުން އެމައްސަލަ ތަހްގީގު ކުރާނެ ކަމަށް ފުލުހުން ބުނެފިއެވެ.
ފުވައްމުލަކު ސިޓީގެ ދެ ފުލުހުން މީހަކު ހައްޔަރު ކުރުމުގެ ތެރެއިން އެމީހާއަށް އަނިޔާވެރިވެފައިވާތަން ފެންނަ ވީޑިއޯއެއް މީސްމީޑިއާގައި އިއްޔެ ވަނީ ދައުރުވެފައިވެއެވެ.
އެގޮތުން އެ ވީޑިއޯގައި ކުށުގެ ތުހުމަތެއްގައި މީހަކު ހައްޔަރު ކުރުމަށް ދެ ފުލުހުން ހަރަކާތްތެރިވާއިރު، އޭގެ ތެރެއިން އެއް އޮފިސަރަކު، ހައްޔަރުކުރަން އުޅުނުމީހާގެ ކަރާއި ދިމާލަށް އެއްފައި އަދި އަނެއްފައި ބަނޑުމަތީގައި އަޅައިގެން އޭނާގެ ގައިމަތީ އިށިންދެގެން އިންނަތަން ވީޑިއޯއިން ފެނެއެވެ.
މިކަމާއި ގުޅިގެން އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝިފާން އެކްސްގައި ކުރެއްވި ޕޯސްޓެއްގައި ވިދާޅުވީ އެފަދަ އެއްވެސް އަމަލަކީ ދިވެހި ފުލުހުންގެ ހިދުމަތުގެ ހަމަތަކުގެ ތެރެއިންނާއި އެ ހިދުމަތުން ބަލައިގަންނާނެ އަމަލެއްނޫންކަމަށެވެ.
އަދި ހިއުމަން ރައިޓްސް ކޮމިޝަން މެދުވެރިކޮށް މިހާދިސާ އިތުރަށް ބެލުމަށް ފުލުހުންގެ ފަރާތުން އެދޭނެ ކަމަށްވެސް ޝިފާން ވިދާޅުވިއެވެ.
Advertisement
This content is created and paid for by advertisers and does not involve Voice Journalists
