ހިޖުރީ އައު އަހަރު ޢަޒުމުކަނޑައަޅަންވީ ޤައުމުގެ ކަންކަން އިޞްލާހުކުރުމުގައި އެންމެން އެކަތިގަނޑަކަށް ވުމަށްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެވެ.

ހިޖުރީ ސަނަތުން 1446 ވަނަ އަހަރު ފެށުމާ ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދިވެހި ރައްޔިތުންނަށް ފޮނުއްވި ތަހުނިޔާގެ ޚިޠާބުގައި، އެމަނިކުފާނު ވިދާޅުވީ ހިޖުރީ އައު އަހަރެއްގައި ދިވެހި ރައްޔިތުން އައުކުރަންވީ އެއް ޢަޒުމަކީ ޤައުމުގެ ކަންކަން އިޞްލާހުކުރުމުގައި އެންމެން އެކަތިގަނޑަކަށް ވުން ކަމަށެވެ.

އެގޮތުން ރާއްޖޭގައި ހުރި ގިނަ މައްސަލަތަކެއް ފާހަގަކުރައްވާފައިވެއެވެ. މީގެ ތެރޭގައި ޤާނޫނާ ޚިލާފަށް ތިބޭ ބިދޭސީންގެ މައްސަލައާއި، މަސްތުވާތަކެއްޗާއި ގޭންގު ކުށްތަކުގެ މައްސަލަ ހިމެނެއެވެ.

Advertisement

ރައީސް އިތުރަށް ވިދާޅުވީ ހިޖުރަކުރުމުގެ މާނައަކީ އިންސާނާ ހުރި ޙާލަތުން ރަނގަޅު ގޮތްތަކަކަށް ރުޖޫޢަވުން ކަމަށެވެ. އެހެންކަމުން އައު އަހަރާއެކު ދިވެހިންގެ ޢަޒުމަކަށް ވާންވީ ރާއްޖޭގެ މާދަމާގެ ސަލާމަތާއި ފުދުންތެރިކަމަށްޓަކައި ސަރުކާރުން ފަށާފައިވާ އިޞްލާޙީ މަސައްކަތްތަކަށް އެއްބާރުލުން ދިނުން ކަމަށް ރައީސް ވިދާޅުވިއެވެ.

މީގެ އިތުރުން، މި އައު އަހަރު ފެށޭއިރު، އިސްލާމީ އުންމަތަށް އޮތް އެންމެ ބޮޑު ކަންބޮޑުވުމަކީ ފަލަޞްޠީނުގެ މުސްލިމުންނަށް ކުރިމަތިވެފައިވާ ނުތަނަވަސްކަމާއި ހަނގުރާމައިގެ ނާމާން ޙާލަތު ކަން ރައީސް ޑރ.މުޢިއްޒު ފާހަގަ ކުރެއްވިއެވެ. އަދި މި ފަދަ ގޮންޖެހުންތަކުން އަރައިގަތުމަށް އިސްލާމީ އުންމަތުގެ އެއްބައިވަންތަކަން ވަރުގަދަކުރަން ޖެހޭ ކަމަށް ރައީސް ފާހަގަކުރެއްވިއެވެ.

އައު އަހަރަކީ ދިވެހިރާއްޖެއަށް ފާގަތި އަހަރެއް ކަމުގައި ހެދުމަށް ސަރުކާރުން ރެޔާއި ދުވާލު މަސައްކަތްކުރާނެ ކަމަށް ރައީސް ވިދާޅުވިއެވެ. އަދި ދިވެހީންގެ އުޖާލާ މުސްތަޤްބަލެއް ބިނާކުރުމަށް ކުރާ މަސައްކަތުގައި މާތްﷲ ބަރަކާތްލެއްވުމަށް އެދިވަޑައިގަތެވެ.