ރާއްޖެ އަށް ތަހައްމަލު ނުކުރެވޭވަރުގެ ދަރަންޏެއް ނުއުފައްދަވާނެ ކަމަށް އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ރޭގައި ބޭއްވި ޕީއެންސީގެ ހަރުގެ ޖަލްސާގައި ވާހަކަފުޅު ދައްކަވަމުން ވަޒީރު ސައީދު ވަނީ ކުރިއަށް އޮތްތަނުގައި ރާއްޖޭގެ އިޤްތިޞާދީ ޙާލަތު ރަނގަޅުވަމުންދާނެކަމުގެ ޔަގީންކަން ދެއްވާފައެވެ.

ވަޒީރު ސައީދު ވިދާޅުވީ، ރާއްޖޭގެ ރޭޓިން ބީ-ޕްލަސްއިން ސީ.ސީ.ސީ-މައިނަސްއަށް ދިޔައީ ބެލުމެއް ނެތި ނެގި ދަރަނިތަކުގެ ސަބަބުން ކަމަށެވެ.

ބައިނަލްއަޤްވާމީ މައިދާނުގައި ރާއްޖޭގެ އިޤްތިޞާދީ ރޭޓިން މިހާ ދަށްވުމަށް މި ސަރުކާރުން ކުރި ކީއްތޯ ސުވާލުއުފައްދަވަމުން ވަޒީރު ސައީދު ވިދާޅުވީ، މިއަދު ތިބި ދަތި ޙާލަތަށް ވައްޓާލީ ނިމުނު ސަރުކާރުގައި ޒިންމާދާރުކަމެއްނެތި ކޮށްފައިވާ ކަންކަމުން ކަމަށެވެ.

އިޤްތިޞާދީ ރިފޯމް މަސައްކަތުގައި ރައްޔިތުންނަށް ބުރައަކަށް ނުވާގޮތަށް ލޯނާއި މާލީ އެހީތެރިކަން ހޯދުމަށް އިސްކަން ދެއްވި ނަމަވެސް، މިއީ ލޯނާއި ދަރަނި ނެގޭ ޙާލަތުގައި ރާއްޖެ އޮތް ވަގުތެއް ނޫންކަމަށާއި، މިވަގުތު އެންމެ އިސްކަމެއް ދެއްވައިގެން ކުރަމުންދާ މަސައްކަތަކީ ބޭރުގެ މާލީ އިދާރާތަކަށް މިވަގުތަށް ދައްކަންޖެހޭ 400 މިލިއަން ޑޮލަރު އަދި 1 ބިލިއަން ޑޮލަރުގެ ދަރަނި، ރައްޔިތުންގެ ހިތްތަކަށް ބިރުވެރިކަން ނާންނާނެގޮތަށް އަދި ވިޔަފާރިވެރިންނަށް ހުރަހެއް ނާންނޭގޮތަށް ދެއްކޭނެ އިންތިޒާމް ހަމަޖެއްސުމުގެ މަސައްކަތްކަމަށް ވެސް ވަޒީރު ވިދާޅުވިއެވެ.

ވަޒީރު ސައީދު އިތުރަށް ވިދާޅުވީ، ރައީސް ޑރ.މުޢިއްޒުގެ ވެރިކަމުގައި މި ރާއްޖެ  މި ރާއްޖެ ނުދަރާނެކަމަށާއި، ރާއްޖެ އިސްތިޞާދީ ގޮތުން ކުރިއަށްދާނެ ކަމަށެވެ. އަދި ބޮލަކަށްޖެހޭ އާމްދަނީވެސް ދާނީ ދުވަހެއް ދުވަހަކަށް އިތުރުވަމުންކަމަށާއި، ވަޢުދުތައްވެސް ފުއްދަމުންދާނެ ކަމަށް ވަޒީރު ވިދާޅުވިއެވެ.