އިކޮނޮމިކް މިނިސްޓަރު މުހައްމަދު ސައީދު އެމެރިކާ އަށް ރަސްމީ ދަތުރުފުޅެއްގައި މިއަދު ފުރާވަޑައިގެންފި އެވެ.

މިނިސްޓްރީ އޮފް އިކޮނޮމިކް ޑިވެލޮޕްމަންޓުން މިކަން އިއުލާނުކޮށް ކުރި ޕޯސްޓެއްގައި ބުނެފައިވަނީ މި ދަތުރުފުޅުގައި ވަޒީރު ސައީދު އެމެރިކާގެ އިގްތިސާދީ ދާއިރާގެ އިސް ބޭފުޅުންނާއި، އެ ގައުމުގެ ވިޔަފާރިވެރިންގެ މައި ޖަމިއްޔާގެ އިސްވެރިންނާ ބައްދަލުކުރައްވާނެ ކަމަށެވެ.

މިނިސްޓްރީން އިތުރަށް ހާމަކުރި ގޮތުގައި މި ދަތުރުފުޅުގެ މައިގަނޑު މަގްސަދަކީ ދިވެހިރާއްޖެއާއި އެމެރިކާއާ ދެމެދު އިގްތިސާދީ ގުޅުންތައް އިތުރަށް ބަދަހިކޮށް، ދިވެހިރާއްޖެއަށް އިންވެސްޓްމަންޓްތައް ހޯދުމަށް މަޝްވަރާކުރުމެވެ.

މިނިސްޓަރު ސައީދު މި ދަތުރުފުޅަށް ފުރާވަޑައިގެންފައިވަނީ، ރާއްޖޭގައި އޮންލައިން ޕޭމަންޓް ސިސްޓަމްތައް ތަޢާރަފުކުރުމަށް ސަރުކާރުން މަސައްކަތްކުރަމުންދާ ދަނޑިވަޅެއްގައެވެ. މިގޮތުން މިއަހަރުގެ ކުރީކޮޅު ސަރުކާރުން ވަނީ އީކޮމާސް ޕްލެޓްފޯމެއް ކަމަށްވާ ޕޭޕަލްގެ އެކްސެސް ރާއްޖެއަށް ހޯދުމަށް އެމެރިކާގެ ސަރުކާރާއެކު މަޝްވަރާތައް ފެށުމަށް ތައްޔާރުވަމުންދާ ކަމަށް ބުނެފައެވެ.