މިމަހު ފަހުކޮޅު ނ އަތޮޅުގައި އާރްޓީއެލްގެ ޚިދުމަތް ފަށަން ތައްޔާރުވެއްޖެއެވެ.

ނ.އަތޮޅުގައި އާރްޓީއެލްގެ ޚިދުމަތް ފެށުމަށްޓަކައި މިިދިޔަ އޭޕްރީލް މަހުގެތެރޭގައި އެމްޓީސީސީ އާއި ހަވާލުކުރިއިރު، މިހާރު ވަނީ އާރުޓީއެލްގެ ޓެސްޓް ދަތުރުތައް ބާއްވާފައެވެ.

މިކަމާއި ގުޅޭގޮތުން ދައުލަތުގެ މީޑިއާ ޕީއެސްއެމް އަށް މައުލޫމާތުދެއްވަމުން ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ބުނީ،  ނ. އަތޮޅުގައި ފެރީގެ ޚިދުމަތް މިމަހު ފަހުކޮޅު ފެށުމަށް ނިންމާފައިވާކަމަށާއި، އެ އަތޮޅުގައި ދަތުރުކުރުމަށް ހަމަޖެހިފައިވަނީ 50 މީހުންގެ ޖާގައިގެ 2 ފެރީކަމަށެވެ.

އެމްޓީސީސީން ބުނީ، 30 ނޮޓްގެ ބާރުމިނުގައި ދުވާ މި ފެރީތަކަކީ އެމްޓީސީސީން ކުރިން ބޭނުންކުރަމުން އައި ފެރީތަކުގެ ސްޕީޑަށްވުރެ 3 ގުނަ އަވަސް ފެރީތަކެއްކަމަށެވެ.

ފަސޭހައިން އެއްރަށުން އަނެއް ރަށަށް ދަތުރުކުރެވޭނެ ޤައުމީ ފެރީ ނިޒާމެއް ޤާއިމުކުރުމަށް ރާއްޖެ 6 ޒޯނަކަށް ބަހާލައިގެން  ކުރަމުން އަންނަ މަސައްކަތުގެ ތެރެއިން މިހާތަނަށް ހއ. އަތޮޅާއި، ހދ. އަތޮޅު އަދި ށ. އަތޮޅުގެ މީހުން ދިރިއުޅޭ ރަށްތަށް ފެރީ ނިޒާމުންވަނީ ގުޅާލާފައެވެ.

މީގެ އިތުރުން، ޅ. އަތޮޅާއި ހުވަދު އަތޮޅުގެ އިތުރުން އައްޑު އަތޮޅުގައިވެސް މިޚިދުމަތް ފަށާފައިވާއިރު، ރ.އަތޮޅާއި ބ.އަތޮޅުގައިވެސް މިޚިދުމަތް ފެށުމަށް އެމްޓީސީސީއާއި ވަނީ ހަވާލުކޮށްފައެވެ.