މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ޑެޕިއުޓީ މެނޭޖިންގ ޑިރެކްޓަރުގެ މަޤާމުން އިސްތިއުފާ ދެއްވި މުޙައްމަދު ބައްސާމް އާދަމް، އިސްތިއުފާ ދެއްވީ ސަރުކާރުން ޚަރަދު ކުޑަކުރުމަށް ކުރައްވަމުންގެންދަވާ މަސައްކަތުގެ ތެރެއިން ކަމަށް ވިދާޅުވެއްޖެއެވެ.

މިއަދު ބައްސާމް "އެކްސް" މެދުވެރިކޮށް ޝާއިޢުކުރެއްވި ޕޯސްޓެއްގައި ވިދާޅުވެފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޚަރަދު ކުޑަކުރުމަށް ކުރައްވަމުންގެންދަވާ މަސައްކަތުގެ ތެރެއިން އެ މަޤާމުން އިސްތިއުފާ ދެއްވީ ކަމަށެވެ.

ބައްސާމު ކުރެއްވި ޕޯސްޓުގައި އިތުރަށް ވިދާޅުވެފައިވަނީ އެމް.އެމް.ޕީ.އާރު.ސީގައި މަސައްކަތް ކުރެއްވި ދުވަސްވަރު މުވައްޒަފުން ބާރުވެރިކުރުމަށާއި، ރާއްޖޭގެ މާކެޓިންގ ކުރިއެރުވުމަށާއި، ބައިނަލްއަޤްވާމީ ގުޅުންތައް ބަދަހިކުރުމަށް މަސައްކަތް ކުރެއްވިކަމަށެވެ.

Advertisement

އަދި އެންމެ އުނދަގޫ ދުވަސްވަރު ކުންފުނި ހިންގުމަށް ރައީސް ޑރ.މުޢިއްޒު އިތުބާރު ކުރެއްވި ކަމަށްޓަކައި ބައްސާމު ޝުކުރު އަދާކުރެއްވިއެވެ.

މީގެއިތުރުން، ކުރިމަގުގައިވެސް ފަތުރުވެރިކަމުގެ ސިނާޢަތު ކުރިއެރުވުމަށް މަސައްކަތް ކުރައްވާނެ ކަމަށާއި، ޤައުމަށް އިތުރު ކުރިއެރުން ހޯދުމަށް އެންމެން ގުޅިގެން މަސައްކަތް ކުރަންވާނެ ކަމަށްވެސް ބައްސާމު ވިދާޅުވިއެވެ.