2013 ވަނަ އަހަރު، މާލޭގައި ތޫނު އެއްޗެހިން ހަމަލާދީ މަރާލި، މއ. އައިޝާ، ހުސައިން ވަހީދުގެ މަރުގެ މައްސަލައިގައި، މަރުގެ އަދަބު ދިނުމަށް ޙުކުމް ކޮށްފައިވާ ކުއްޖާއަށް، ހުސައިންގެ މަންމަ މަޢާފް ދިނުމުން އެ ކުއްޖާ މަރުގެ އަދަބުން ސަލާމަތްވެއްޖެ އެވެ.

ހުސައިން ވަހީދަށް ތޫނު އެއްޗެހިން ހަމަލާދީ މަރާލި މައްސަލާގައި ދެ ކުއްޖަކު މެރުމަށް 2015 ވަނަ އަހަރު، ޖުވެނައިލް ކޯޓުން ހުކުމްކުރި އެވެ. މި ހުކުމަށް ހައިކޯޓުން ތާއީދުކުރުމާ ގުޅިގެން، އޭގެ ތެރެއިން އެއް ކުއްޖަކު ސުޕްރީމް ކޯޓުގައި މައްސަލަ އިސްތިއުނާފުކުރިއެވެ.

އެ މައްސަލައިގައި ސުޕްރީމް ކޯޓުން މިއަދު ކުރި ޙުކުމުގައިވަނީ، މައްސަލަ ކޯޓުގައި ވަނިކޮށް، 2022 ވަނަ އަހަރު ހުސައިން ވަހީދުގެ މަންމަ ސުޕްރީމް ކޯޓަށް ސިޓީއެއް ފޮނުވާ، މަޢާފް ދޭން ބޭނުންވާ ކަމަށް ބުނެފައިވާ ކަމަށެވެ.

އިސްލާމީ ޝަރީއަތުގެ ދަށުން އެންމެ ވާރިސަކު މައާފް ދިން ނަމަވެސް ޤާތިލަށް މަރުގެ އަދަބެއް ނުދެވޭނެ އެވެ. އެހެންކަމުން ސުޕްރީމް ކޯޓުން ކުރި ޙުކުމުގައި ވަނީ، އެ ކުއްޖާގެ މައްޗަށް ކަނޑައެޅި މަރުގެ އަދަބު ބާތިލްކުރީ ކަމަށާއި އަދި އެ ކުއްޖާގެ މައްޗަށް ޤާނޫނީ ގޮތުން ދެން ކަނޑައެޅޭނެ އަދަބަކާ މެދު ގޮތެއް ނިންމުމަށް ޖުވެނައިލް ކޯޓަށް އެ މައްސަލަ ތަހުވީލްކުރީ ކަމަށެވެ.

މި ޙުކުމް އިއްވާފައިވަނީ މައްސަލަ ބެއްލެވި 5 ފަނޑިޔާރުންގެ އިއްތިފާޤުންނެވެ. މައްސަލަ ސުޕްރީމް ކޯޓުން ބެއްލެވީ ފަނޑިޔާރު މަހާޒް އަލީ ޒާހިރާއި ފަނޑިޔާރު އައިޝާ ޝުޖޫން މުހައްމަދާއި ފަނޑިޔާރު ހުސްނުއްސުއޫދުގެ އިތުރުން ފަނޑިޔާރު އަލީ ރަޝީދު އަދި ފަނޑިޔާރު ޑރ. މުހައްމަދު އިބްރާހިމެވެ.

ހުސައިން ވަހީދު މަރުވެފައި ވަނީ، 2013 ވަނަ އަހަރުގެ ޑިސެމްބަރު 24 ވަނަ ދުވަހުގެ ރޭ، އޭނާ ދިރިއުޅޭ މއ. އާއިޝާ ކައިރީގައި ހުއްޓާ، އަށް އިންޗީގެ ވަޅިއެއް އޭނާގެ މެއަށް ހަރާލުމުގެ ސަބަބުން ލިބުނު އަނިޔާއަށް ފަރުވާ ހޯދަމުންދަނިކޮށެވެ.