ވަރަށް އަވަހަށް ޗައިނާއިން އައްޑުއަށް ސީދާ ދަތުރުތައް ފެށޭނެކަމަށް ފަތުރުވެރިކަމާ ބެހޭ ވަޒީރު، އިބްރާހިމް ފައިސަލް ވިދާޅުވެއްޖެއެވެ.
ޕީއެންސީން ބޭއްވި ޖަލްސާޢެއްގައި ވާހަކަދައްކަވަމުން، ފައިސަލް ވިދާޅުވީ, އައްޑޫގައި ފަތުރުވެރިކަމުގެ ސިނާޢަތް ކުރިއެރުވުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ބޮޑު ތަސައްވުރެއް ކަމަށާއި އެކަމަށް ޓަކައި ގިނަ މަސައްކަތްތަކެއް ކުރައްވަމުން ގެންދަވާ ސިނާޢަތެއް ކަމަށެވެ.
ފައިސަލް ވިދާޅުވީ ޗައިނާގައި އޮތް އައިޓީބީ ފެއާގައި ޗައިނާގެ އެއާލައިންތަކާ ބައްދަލުކޮށް ޗައިނާއިން އައްޑުއަށް ސީދާ ދަތުރުތައް ފަށަން އެދިފައިވާކަމަށެވެ. އަދި ވަރަށް އަވަހަށް ޗައިނާގެ އެކި ޕްރޮވިންސްތަކުން އައްޑުއަށް ސީދާ ދަތުރުތައް ފެށޭނެކަމަށާއި، ޕްލޭނަކީ އައްޑޫގައި ސީޕްލޭން ޓާމިނަލެއް ޤާއިމުކޮށް, ސީދާ ދަތުރުތައް ފަށައި, ފަތުރުވެރިކަން މުޅި ދެކުނަށް ޑައިވަރޓު ކުރުންކަމަށް ވަޒީރު ފާހަގަ ކުރެއްވިއެވެ.
މީގެ އިތުރުން ފައިސަލް ވިދާޅުވީ، އައްޑޫގައި ފަތުރުވެރިކަން ކުރިއެރުވުމަށް ބޭނުންވާ އެންމެ ބޮޑު ކަމަކީ ޝަންގްރިއްލާގެ އޮޕަރޭޝަން ފެށުން ކަން ފާހަގަ ކުރައްވާ، ފައިސަލް ވިދާޅުވީ އެ ކަން އެއް އަހަރު ތެރޭ ކޮށްދެއްވާނެކަމަށް ރައީސް ޑރ.މުޢިއްޒު ކެމްޕޭން ވައުދުވެވަޑައިގެންކަމަށެވެ.
އެހެންކަމުން އެ ވަޢުދުފުޅު ފުއްދެއްވުމަށްޓަކައި، މުހިންމު މަސައްކަތްތަކެއް ކުރައްވަމުން ގެންދަވާ ކަމަށާއި ޝަންގްރިއްލާގެ މެނޭޖްމަންޓާވެސް ބައްދަލުކުރެވިފައިވާކަމަށް ފައިސަލް ވިދާޅުވިއެވެ. އަދި ޝަންގްރިއްލާގެ އޯނަރުންނާ ބައްދަލުކުރުމަށް ދަތުރުކުރައްވަން ޖެހިވަޑައިގަންނަވާނަމަ އެކަން ވެސް ކުރައްވާނެ ކަމަށްވެސް ފައިސަލް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
