ރޮހިންޔާ ޤަޠުލުޢާންމުގެ މައްސަލައިގައި ރާއްޖެއިން ތަދައްޚުލުވުމަށް އެދި ހުށަހެޅި ހުށަހެޅުން އިންޓަރނޭޝަނަލް ކޯޓް އޮފް ޖަސްޓިސް (އައި.ސީ.ޖޭ.) އިން ބަލައިގެންފިއެވެ.
މިއަދު ބަންޑާރަ ނައިބުގެ އޮފީހުން ނެރުނު ނޫސްބަޔާނެއްގައި ބުނެފައިވަނީ އައި.ސީ.ޖޭ ގައި ކުރިއަށްދާ "އެޕްލިކޭޝަން އޮފް ދަ ކޮންވެންޝަން އޮން ދަ ޕްރިވެންޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑް (ދަ ގެމްބިއާ ވ. މިޔަންމާ)" މައްސަލައަށް ތަދައްޚުލުވުމަށް އެދި ދިވެހިރާއްޖެއިން ހުށަހެޅި ޑެކްލަރޭޝަން އޮފް އިންޓަރވެންޝަން ބަލައިގެންނެވުމަށް އައި.ސީ.ޖޭ. އިން ނިންމާފައިވާ ކަމަށެވެ.
މި ނިންމެވުން ނިންމާފައިވަނީ، އައި.ސީޖޭ. ގެ ފަނޑިޔާރުންގެ އިއްތިފާޤުން މި ޖުލައި މަހުގެ 3 ވަނަ ދުވަހުއެވެ.
ބަންޑާރަ ނައިބުގެ އޮފީހުން ހާމަ ކުރެއްވި ގޮތުގައި، ޤަތުލު ޢާންމުގެ ކުށް ހުއްޓުވުމާއި އަދަބު ދިނުމާގުޅޭ މުޢާހަދާގެ މާއްދާތައް މާނަކުރުމާ ގުޅޭގޮތުން ދިވެހިރާއްޖޭގެ ޑެކްލަރޭޝަން އޮފް އިންޓަރވެންޝަން ގައި ހުރި ކަންކަމަކީ އެ ކޯޓަށް ބެއްލެވޭނެ ކަންކަން ކަމަށް އެ ކޯޓުން ވަނީ ނިންމާފައެވެ.
އައި.ސީ.ޖޭ. ގައި ކުރިއަށް ދާ މި މައްސަލައަކީ، މިޔަންމާގައި ރޮހިންޔާ މުސްލިމުންނާ ދެކޮޅަށް ހިންގަމުންދާ އަނިޔާވެރި ލާއިންސާނީ ޢަމަލުތަކާ ގުޅިގެން، ގެމްބިއާ އިން، މިޔަންމާއާ ދެކޮޅަށް 11 ނޮވެމްބަރ 2019 ގައި، ހުށަހަޅާފައިވާ މައްސަލައެކެވެ.
މި މައްސަލައިގައި ދިވެހިރާއްޖޭން ތަދައްޚުލުވުމަށް އެދި ހުށަހެޅި ހުށަހެޅުން އައި.ސީ.ޖޭ. އިން ބަލައިގެންފައިވަނީ، މި ކަމާމެދު މިޔަންމާއިން އިޢުތިރާޟެއްވެސް ހުށަހަޅާފައިވަނިކޮށް ކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
