މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ދުނިޔޭގެ ކާބޯތަކެއްޗާއި ބެހޭ ޖަމްޢިއްޔާ (އެފްއޭއޯ) ގެ މަސްވެރިކަމާބެހޭ ކޮމިޓީގެ 36 ވަނަ ޖަލްސާގައި ބައިވެރިވެވަޑައިގަންނަވައިފިއެވެ.
މިބައްދަލުވުމުގެ ހުޅުވުމުގެ ރަސްމިއްޔާތުގައި ވަޒީރު، އަޙްމަދު ޝިޔާމް ވަނީ ދިވެހިރާއްޖޭގެ މަސްވެރިކަމުގެ ދިގު ތާރީޚާއި ދިވެހި މަސްވެރިކަމުގެ ތަރިކައިގެ މުހިންމުކަން ފާހަގަކުރައްވާފައެވެ.
އަދި މަސްވެރިކަމަކީ ރާއްޖޭގެ އިޤްތިޞާދުގެ މައި އެއްތަނބު ކަން ފާހަގަ ކުރައްވާ، މި ސިނާޢަތުގައި ރާއްޖޭގެ މަސައްކަތްތެރިންގެ 11 އިންސައްތަ މީހުން ވަޒީފާ އަދާކުރާއިރު، އެ ސިނާއަތް އަމާނާތްތެރިކަމާއެކު އަންނަން އޮތް ޖީލަށް ފޯރުކޮށްދޭން ޖެހޭ ކަމަށް ޝިޔާމް ވިދާޅުވިއެވެ.
ޝިޔާމް އިތުރަށް ވިދާޅުވީ، މަސްވެރިކަމާއި ކަނޑުގެ ވަސީލަތްތައް ހިމާޔަތް ކުރުމަށް ރާއްޖެއިން މުހިންމު ގިނަ ފިޔަވަޅުތަކެއް އަޅާފައިވާ ކަމަށާއި ދެމެހެއްޓެނިވި މަސްވެރިކަމެއްކޮށް ދުނިޔެއަށް ރާއްޖެއިން އެކަމުގެ މިސާލު ދައްކުވާފައިވާ ކަމަށެވެ. ނަމަވެސް އެ މަސައްކަތް ރާއްޖެއަށް އެކަނި ނުކުރެވޭނެކަން ފާހަގަކުރައްވައި ވަޒީރު ވިދާޅުވީ، މިހާރު ކުރިމަތިވެފައިވާ ގޮންޖެހުންތަކުން އަރައިގަތުމަށް ޤައުމުތަކުގެ އެހީތެރިކަން ބޭނުންވާ ކަމަށެވެ.
ރާއްޖެ ފަދަ ކުދި އަދި ތަރައްޤީވަމުން އަންނަ ޤައުމުތަކަށް މަސްވެރި ސިނާޢަތުގައި ވިޔަފާރި ކުރުމަށް ހުރި ހުރަސްތަކަށްވެސް ވަޒީރުވަނީ އަލިއަޅުއްވާލައްވާފައެވެ.
ވަޒީރުގެ ވާހަކަފުޅު ނިންމަވާލައްވަމުން ވަނީ، ދެމެހެއްޓެނިވި މަސްވެރިކަން ކުރިއެރުވުމަށް އަޅަން ޖެހޭ ފިޔަވަޅުތައް އެޅުމަށް ދުނިޔޭގެ ލީޑަރުންނަށް ގޮވާލައްވާފައެވެ.
މިބައްދަލުވުމުގައި ވަޒީރު ވަނީ ދުނިޔޭގެ ކާބޯތަކެއްޗާއި ބެހޭ ޖަމްޢިއްޔާގެ އިސް ބޭފުޅުންނާއި ބައްދަލުކުރައްވައި ދިވެހިރާއްޖެއަށް އެހީތެރިކަން ބޭނުންވާ ދާއިރާތައް ފާހަގަކުރައްވައި އެކަމާއިގުޅޭގޮތުން މަޝްވަރާކުރައްވައިފިއެވެ.
އެގޮތުން ދުނިޔޭގެ ކާބޯތަކެއްޗާއި ބެހޭ ޖަމްޢިއްޔާގެ އެހީތެރިކަމާއިއެކު 1980ގެ ކުރީކޮޅު ފެށި ކަނދުފަތީގެ މަޝްރޫޢު އިތުރަށް ހަރުދަނާކުރުމަށް އެހީތެރިކަން ފޯރުކޮށްދިނުމަށް ވަނީ އެއްބަސްވެފައެވެ. މިގޮތުން ކަނދުފަތި ކަނޑައިގެންދާ މިންވަރު މަދުކުރުމާއި ސައިންޓިފިކް މަޢުލޫމާތު އިތުރުކުރެވޭނެ ގޮތްތަކާއި މަސްއައިނު ދިގުމުއްދަތަކަށް ބެހެއްޓޭނެ ގޮތްތައް ބަލައި ކަނދުފަތީގެ ޑިޒައިންއަށް ބަދަލުތަކެއް ގެންނަންޖެހޭ ނަމަ އެބަދަލުތައް ގެނައުމަށްވެސް ވަނީ އެއްބަސްވެފައެވެ. މިއީ ގާތްގަނޑަކަށް 4.5 މިލިއަން ރުފިޔާގެ މަޝްރޫޢެކެވެ.
މީގެ އިތުރުން މިނިސްޓްރީގެ މެންޑޭޓަށް ގެނެވުނު ބަދަލާއިއެކު އޯޝަން ރިސޯސަސް ގާނޫނެއް ޑްރާފްޓްކުރުމަށް ބޭނުންވާ ތަޖްރިބާކާރުންގެ އެހީތެރިކަން ފޯރުކޮށްދިނުމަށްވެސް އެއްބަސްވެފައިވާކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވަނީ ހާމަ ކުރައްވާފައެވެ. އެ ވުޒާރާއިން ހާމަ ކުރެއްވި ގޮތުގައި، މިކަމަކީ މަސްވެރިކަމުގެ އިތުރަށް ދިވެހިރާއްޖޭގެ ކަނޑުގެ ވަޞީލަތްތަކުން ފުރިހަމަ ނަފާ ހޯދުމަށް ކުރަމުންދާ މަސައްކަތްތައް ދެމެހެއްޓެނެވި ގޮތަކަށް ކުރިއަށް ގެންދިއުމަށް މުހިއްމު ގާނޫނަކަށް ވެގެންދާނެ ކަމެކެވެ.
މީގެ އިތުރުން، މި ބައްދަލުވުމުގައި ވަނީ، މެރިކަލްޗަރ، ސިނާޢަތެއްގެ ގޮތުގައި ކުރިއެރުވުމަށް ސަރުކާރުން ކުރަމުންދާ މަސައްކަތުގައި ބޭނުންވާ ފަންނީ އަދި މާލީ އެހީތެރިކަން ފޯރުކޮށްދިނުމާއި ބެހޭގޮތުންވެސް މަޝްވަރާކުރައްވާފައެވެ. އަދި އިންޓަރނޭޝަނަލް ފަންޑް ފޮރ އެގްރިކަލްޗަރ ޑިވެލޮޕްމަންޓްގެ ނައިބު ރައީސް އަރިހަށް ކުރެއްވި ޒިޔާރަތުގައި މެރިކަލްޗަރ ސިނާޢަތް ތަރައްޤީކުރުމަށް އަމިއްލަ ވިޔަފާރިތަކަށް ބޭނުންވާ މާލީ އެހީތެރިކަން ފޯރުކޮށްދިނުމާއި ބެހޭގޮތުން ވެސް މަޝްވަރާކުރެއްވިއެވެ. އަދި މަސްވެރިކަމުގެ ސިނާޢަތުގައި ބޭނުންކުރާ ހަކަތައިގެ 35 އިން ސައްތަ އިޔާދަކުރެނެވި ހަކަތައިން ފޯރުކޮށްދިނުމަށް ކުރާ މަސައްކަތަށް ބޭނުންވާ މާލީ އެހީތެރިކަން ފޯރުކޮށްދިނުމާއި ބެހޭގޮތުންވެސް ވަނީ މަޝްވަރާކުރައްވާފައެވެ.
މިއާއިއެކު ވަޒީރު ޝިޔާމް ވަނީ އިޓަލީގެ ޤާނޫނު ހަދާ މަޖިލިހުގެ މަތިގެ (ސެނެޓު)ގެ ނައިބު ރައީސް ގިއަންމަރކޯ ކެންޓަނިއޯ އާއި ބައްދަލުކުރައްވައި ކުރެވުނު މަޝްވަރާގައި މަސްވެރިކަމުގެ ސިނާޢަތުގައި އިންވެސްޓްކުރުމަށް ހުރި ފުރުޞަތުތައް ފާހަގަކުރައްވާފައެވެ. އެގޮތުން, ސްޕޯރޓްސް ފިޝިންގް މެރީނާ ގާޢިމުކުރުމާއި މެރިކަލްޗަރ ސިނާޢަތުގައި ހުރި ފުރުޞަތުތައް ފާހަގަކުރައްވާ، ޔޫރަޕަށް ދިވެހިރާއްޖެއިން އެކްސްޕޯޓްކުރާ މަހާއި މަހުގެ އުފެއްދުންތަކަށް ނަގާ ޑިއުޓީ ކަޑާލުމަށް ކުރަމުންދާ މަސައްކަތްތަކުގެ މަޢުލޫމާތު ފޯރުކޮށްދީ އިޓަލީގެ އެހީތެރިކަމަށްވެސް ވަނީ އެދިލައްވާފައެވެ.
Advertisement
This content is created and paid for by advertisers and does not involve Voice Journalists
