ބޯޓުތަކުގެ އޮޕަރޭޝަނަށް ގެނައި ބަދަލާއެކު މަސްވެރީންނަށް ބޮޑު ލުޔެއް ލިބިގެންދާނެކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ބުނެފިއެވެ.

މިފްކޯއިން ހާމަކުރި ގޮތުގައި، އެ ކުންފުނީގެ ކަޅުބިލަމަސް ގަންނަ ބޯޓުފަހަރުގެ އޮޕަރޭޝަނަށް ގެނައި ބަދަލާއެކު މަސް ކިރުމުގައި މަސްވެރީންނަށް މިހާރު ދިމާވާ ބައެއް ތަކުލީފުތަކަށް ބޮޑު ލުޔެއް ލިބިގެންދާނެއެވެ.

މިފްކޯއިން ބުނީ ރާއްޖޭގެ ދެކުނުގައި މަސްގަންނަން އޮޕަރޭޓްކުރާ އާރުއެސްޑަބްލިޔު 27.5 ޓަނު ޖާގައިގެ ބޯޓުފަހަރުގެ ތެރެއިން ރަންދި 23، 24، 25، 26، ފެލިވަރުން އޮޕަރޭޓް ކުރާ ބޯޓުތަކެއްގެ ގޮތުގައި ހަމަޖައްސާފައިވާ ކަމުގައެވެ. އެ ހަތަރު ބޯޓުވެސް ކުރިން އޮޕަރޭޓް ކުރަމުންދިޔައީ ކޫއްޑޫއިންނެވެ.

Advertisement

މީގެއިތުރުން، ފެލިވަރުން އޮޕަރޭޓު ކުރަމުންދިޔަ، ދުވާލަކު 100 ޓަނަށްވުރެ ގިނަ މަސް ގަނޑުކުރެވޭ ބޯޓެއްކަމުގައިވާ، ޖަޒީރާ-102  ދެން އޮޕަރޭޓް ކުރާނީ ކޫއްޑޫ ސައިޓުން ކަމަށްވެސް މިފްކޯއިން މައުލޫމާތު ދެއެވެ.

މިކަމާގުޅޭ އިތުރު މައުލޫމާތު ހިއްސާކުރައްވަމުން މިފްކޯގެ އޮޕަރޭޝަންސް ހިންގެވުމާ ހަވާލުވެ ހުންނެވި އެކުންފުނީގެ ޖެނެރަލް މެނޭޖަރު އަހުމަދު ޒާހިރު ވިދާޅުވީ މި ބަދަލު ގެނައީ، ފެލިވަރަކީ ދަޅު ބަންދުކުރާ ފެކްޓްރީއަކަށް ވެފައި، އެތަނަށް ބޮޑަށް ބޭނުންވާ، އާރުއެސްޑަބްލިޔުގައި ބެހެއްޓިފައިހުންނަ ތާޒާމަސް ހޯދުމުގެ މަގުސަދުގައި ކަމަށެވެ. އަދި މި ހަތަރު ބޯޓް އުތުރަށް ބަދަލުކުރުމުން އިތުރު ބަނދަރުތަކެއްގައި މަސްގަންނަ ބޯޓު ބޭއްވޭނެ ކަމަށާއި މިކަމުގެ ސަބަބުން އުތުރުގައި ކަނޑުމަހުގެ މަސްވެރިކަން ކުރާ މަސްވެރީންނަށް މަސްކިރޭނެ ކަމުގެ ޔަގީންކަން އިތުރުވެގެންދާނެކަން ޒާހިރު ފާހަގަ ކުރެއްވިއެވެ.

ޒާހިރު އިތުރަށް ވިދާޅުވީ، ދެކުނުގައި މަސްވެރިކަން ރަނގަޅު ދުވަސްވަރު ރަންދި ސީރީޒްގެ ކުޑަ ބޯޓަކަށް އެންމެ ދޯންޏެއްގެ މަސްވެސް ނުކިރޭކަމަށާއި، އެހެން ނަމަބެސް ޖަޒީރާ-102 ދެކުނަށް ބަދަލުކުރުމުން އެ ސަރަހައްދުގައި ފްރީޒްކުރެވޭ މަސް އިތުރުވެގެންދާނެކަމުގައެވެ. އަދި އެކަމުގެ ސަބަބުން މަސްވެރި މޫސުމުގައި އޮޑިދޯނިފަހަރުތަކުން މަސްކިރުމަށް ހަދާ ކިއު ކުޑަވެގެންދާނެ ކަން އޭނާ ފާހަގަކުރެއްވިއެވެ.

މިފްކޯގެ ފްލީޓާއި އެންމެ ފަހުން ގުޅުނު ޖަޒީރާ-106 އާއި ޖަޒީރާ-105 ވެސް މަސްގަތުމުގައި ހަރަކާތްތެރިވަމުން ދާކަން ހާމަ ކުރައްވާ، ދާދި އަވަހަށް ޖަޒީރާ-104 ވެސް އޮޕަރޭޝަނަށް ގެނެވޭނެ ކަމަށް މިފްކޯއިން ވަނީ ބުނެފައެވެ. އެގޮތުން ޖަޒީރާ-104 މިހާރު އޮތީ މާލޭގެ ބަނދަރުގައި ކަމަށާއި، އެބޯޓަށް މަސްގަތުމުގެ އެންމެ ފަހުގެ ތައްޔާރީތަށް ވަމުން އަންނަކަމަށް މިފްކޯއިން ބުނެއެވެ. މިފްކޯއިން ދެކޭގޮތުގައި އެކުންފުނިން މަސްގަންނަ ފްލީޓަށް ކުރިއަށް އޮތް މަސްވެރިކަމުގެ މޫސުން ފެށޭއިރު، 150 ޓަން އިތުރަށް ފްރީޒް ކުރެވޭނެއެވެ.

މިފްކޯގެ ފްލީޓުގައި 1ކެރިއަރ ވެސަލް އޮތް އިރު، މަސްކިރުމުގެ އޮޕަރޭޝަންގައި މިވަގުތު 13 ބޯޓު ހަރަކާތްތެރިވެއެވެ. އަދި ބޯޓުފަހަރުތަކަށް ކިރާ މަސް ސައިޓަށް ގެންދިޔުމުގައި މަދާ ވެސެލްގެ ގޮތުގައި 5 ބޯޓު އަންނަނީ ހަރަކާތްތެރިވަމުންނެވެ.