ރާއްޖެއަށް މަސްތުވާތަކެތި އެތެރެކުރާ ފަރާތްތަކުން ޤާނޫނާ ޚިލާފު އެހެނިހެން ތަކެތިވެސް އެތެރެކުރުމުގެ ފުރުސަތު އޮތްކަމަށް މޯލްޑިވްސް ކަސްޓަމްސް ސަރވިސްއިން އިންޒާރުދީފިއެވެ.
ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީގެ ބައްދަލުވުމެއްގައި ކަސްޓަމްސްއިން މިހެން ބުނެފައިވަނީ، މަސްތުވާތަކެތި އެތެރެކުރުމާއި ޤާނޫނާ ޚިލާފަށް ތަކެތި އެތެރެކުރުން ހުއްޓުވުމުގައި ހުރި ގޮންޖެހުންތަކާ ގުޅޭގޮތުން ކުރެވުނު ސުވާލުތަކަށް ޖަވާބުދެމުންނެވެ.
ކަސްޓަމްސްއިން ބުނީ، މަސްތުވާތަކެތި އެތެރެކުރާ ފަރާތްތަކުން ބަނދަރަށް އައުމުގެ ކުރިން ކަނޑުމަތިން އެތަކެތި ލޯކަލް އުޅަނދުފަހަރުގައި ބާލައިގެން ފަޅު ރަށްރަށަށް ގެންގޮސް އެތެރެކުރާކަމުގެ މަޢުލޫމާތު ލިބިފައިވާ ކަމަށެވެ. އަދި މިގޮތަށް ތަކެތި އެތެރެކުރެވޭނަމަ ހަމައެކަނި މަސްތުވާތަކެތި ނޫން، އެހެނިހެން ޤާނޫނާ ޚިލާފު ތަކެތިވެސް އެތެރެކުރުމުގެ ފުރުސަތު އޮންނާނެކަމަށް ކަސްޓަމްސްއިން ވަނީ އިންޒާރުދީފައެވެ.
މިކަން ހުއްޓުވުމަށްޓަކައި ސަރަޙައްދީ ޤައުމުތަކާއެކު މަޢުލޫމާތު ޙިއްސާކުރުމާއި، ސަރވައިލަންސް އަދި މޮނިޓަރިންގ ހަރުދަނާކުރުމުގެ މަސައްކަތް ކުރަމުންދާކަމަށް ކަސްޓަމްސްއިން ބުނެފައިވެއެވެ.
ކޮމިޓީގެ ބައްދަލުވުމުގައި ރާއްޖޭގެ ބައިނަލްއަޤްވާމީ ބަނދަރުތަކާއި ކަނޑުގެ ސަރަޙައްދު ބެލެހެއްޓުމުގައި ހުރި ގޮންޖެހުންތައްވެސް ކަސްޓަމްސްއިން ފާހަގަކޮށްފައިވެއެވެ.
ކަސްޓަމްސްއިން އިތުރަށް މަޢުލޫމާތު ދެމުން ބުނެފައިވަނީ، ރާއްޖޭގެ ސަލާމަތާއި ރައްކާތެރިކަން ކަށަވަރު ކުރުމަށް އެމްއެންޑީއެފްއިން ރާއްޖޭގެ ސަރަޙައްދު ކަނޑާއި ވައިގެ މަގުން 24 ގަޑިއިރު ބަލަހައްޓަމުންދާއިރު، ކަސްޓަމްސްގެ މަސްއޫލިއްޔަތުތައްވެސް އެމްއެންޑީއެފްއާ ގުޅިގެން އަދާކުރަމުންދާ ކަމަށެވެ.
މީގެ ތެރޭގައި އުޅަނދުފަހަރު އައުމުގެ ކުރިން އެ އުޅަނދުތަކާ ބެހޭ މަޢުލޫމާތު ހޯދައި، ރިސްކުތައް ދެނެގަނެ، ރިސްކު އޮންނަ ޙާލަތުގައި އެމްއެންޑީއެފްއާއި ފުލުހުންނާ ގުޅިގެން ޚާއްސަ އޮޕަރޭޝަންތައް ހިންގުން ހިމެނެއެވެ.
މި މަސައްކަތްތައް އިތުރަށް ހަރުދަނާކުރުމަށް، މުއައްސަސާތަކުގެ މެދުގައި މަޝްވަރާކޮށް، މުވައްޒަފުންގެ ޤާބިލުކަން އިތުރުކުރުމަށް ރާއްޖެއާއި ރާއްޖެއިން ބޭރުގައި ޚާއްސަ ތަމްރީނުތައް ދެމުންދާ ކަމަށްވެސް ކަސްޓަމްސްއިން ބުނެފައިވެއެވެ.
އަދި ސަރަޙައްދީ ޤައުމުތަކާއެކު މަޢުލޫމާތު ޙިއްސާކުރުމާއި، ސަރވައިލަންސް އަދި މޮނިޓަރިންގ އިތުރަށް ހަރުދަނާކުރުމަށް ރާއްޖެއާއި ރާއްޖެއިން ބޭރުގެ ކަމާބެހޭ ފަރާތްތަކާ ގުޅިގެން މަސައްކަތްކުރަމުންދާ ކަމަށްވެސް ކަސްޓަމްސްއިން ފާހަގަކޮށްފައިވެއެވެ.
ކަސްޓަމްސްއިން އިތުރަށް ބުނެފައިވަނީ، ދިވެހިރާއްޖެއަށް މަސްތުވާތަކެތި އެތެރެވުން ހުއްޓުވުމުގައި ސަރުކާރުގެ ސިޔާސަތުތަކާ އެއްގޮތަށް ކަސްޓަމްސްއިން ތަންފީޒްކުރަންޖެހޭ ޤާނޫނުތަކާއި ގަވާއިދުތައް ތަންފީޒްކުރުމުގައި ސާބިތުކަމާއެކު ދެމިތިބޭނެ ކަމަށެވެ.
Advertisement
This content is created and paid for by advertisers and does not involve Voice Journalists
