އަންނަ އަހަރުން ފެށިގެން ޤައުމީ ޤުރުއާން މުބާރާތަކީ ރާއްޖޭގައި އެންމެ އަގުބޮޑު އަދި އެންމެ ގިނަ އިނާމުތައް ދޭ މުބާރާތް ކަމުގައި ހަދާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މި ފަދައިން ވިދާޅުވީ ކީރިތި ޤުރްއާން ކިޔެވުމުގެ 36 ވަނަ ޤައުމީ މުބާރާތް ނިންމުމުގެ ޖަލްސާގައި ވާހަކަފުޅު ދައްކަވަމުންނެވެ.

ޖަލްސާގައި ވާހަކަ ދައްކަވަމުން، ރައީސް އިތުރަށް ވިދާޅުވީ، ދިވެހީންނަކީ އިސްލާމްދީނުގައި ދެމިތިބޭތާ މިހާރު ގާތްގަނޑަކަށް 900 އަހަރު ވަމުންދާ ބައެއް ކަމަށާއި، މި ދިގު މުއްދަތުގައި ދިވެހީންނާއި ކީރިތި ޤުރްއާނާ ދެމެދު ވަރަށް މަތިވެރި ފުން ގުޅުމެއް އުފެދިފައިވާ ކަމަށެވެ. އަދި ދިވެހީންގެ ސަގާފަތުގައި ހިމެނޭ ކީރިތި ޤުރްއާން ކިޔެވުމާ ގުޅުން ހުރި ކަންކަން ރައީސް ވަނީ ފާހަގަ ކުރައްވާފައެވެ.

އެގޮތުން ތުއްތު ކުދިންނަށް އަކުރު އުނގަންނައިދޭން ފަށާ ހިސާބުން ކީރިތި ޤުރުއާން ދަސްކޮށްދޭން ފަށާކަމާއި، ކޮންމެ ރެޔެއްގެ މަޣުރިބު ނަމާދާއި ޢިޝާ ނަމާދާ ދެމެދު ކޮންމެ ގެއެއްގައި ކީރިތި ޤުރްއާން ކިޔެވުން އޮންނަ ކަމުގެ އިތުރުން، ކޮންމެ ކުއްޖަކު ވަކި އުމުރަކަށް ދިޔުމުގެ ކުރިން ޤުރްއާން ޚަތިމުކޮށް ދަސްކިޔުއްވުން އޮންނަ ކަން ރައީސް ފާހަގަ ކުރެއްވިއެވެ.

ރައީސް ވަނީ، އެ މަނިކުފާނުގެ ސަރުކާރުގައި، ކީރިތި ޤުރްއާނުގެ ޢިލްމާއި ކިޔެވުމުގެ ފަންނު ކުރިއެރުވުމަށް އަވަސް ފިޔަވަޅުތަކެއް އަޅަމުންދާ ކަން ފާހަގަކުރައްވާ، ކުރިއަށް އޮތްތާ ކުރަން ގަސްތުކުރައްވާފައިވާ ބައެއް ކަންކަން ޙިއްސާ ކުރައްވާފައެވެ. މީގެ ތެރޭގައި:

1. "ދާރުއްސަލާމް" އަދި "ދާރުލްއަރްޤަމް" ނަމުގައި އާ ވަޤުފު އިމާރާތްތަކެއް އެޅުން.

2. ހިލޭ ކީރިތި ޤުރްއާން ކިޔެވޭނެ ކިލާސްތައް އިތުރުކޮށް، މުޅި ރާއްޖެއަށް މި ޚިދުމަތް ފުޅާކުރުން.

3. ކީރިތި ޤުރްއާން ހިތުދަސް ހާފިޒުންނަށް ލިބޭ އިނާޔަތް ދެ ގުނަޔަށް ބޮޑުކުރުން.

4. ކީރިތި ޤުރްއާނާ ބެހޭ މަރުކަޒެއް އަލުން އިމާރާތްކުރުން.

މީގެ އިތުރުން، ޒަމާނީ ޓެކްނޯލޮޖީގެ އެހީގައި ތައްޔާރުކޮށް އާންމުކުރެވޭ ކީރިތި ޤުރްއާނާ ބެހޭ ޚާއްޞަ ދާއިމީ މައުރަޒެއް ރާއްޖޭގައި ޤާއިމުކުރުމަށް ގަސްތުކުރައްވާ ކަމަށް ވެސް ރައީސް ވިދާޅުވިއެވެ.