ކީރިތި ޤުރްއާން ކިޔެވުމުގެ 36 ވަނަ ޤައުމީ މުބާރާތް ނިންމުމުގެ ޖަލްސާގައި ރައީސުލްޖުމްހޫރިއްޔާ ދެއްވި ތަޤްރީރުގައި، ކީރިތި ޤުރްއާނުގެ ޢިލްމު ކުރިއެރުވުމަށް އިތުރު ވަޤުފު ޢިމާރާތްތައް އެޅުމަށް ސަރުކާރުން ނިންމާފައިވާކަން ހާމަކުރައްވައިފިއެވެ.
ރައީސް ވިދާޅުވި ގޮތުގައި، މިހާރު މާލޭގައި ހުރި "ދާރުލް އީމާން" އިމާރާތުގެ އިތުރުން، "ދާރުއްސަލާމް" އަދި "ދާރުލްއަރްޤަމް" ގެ ނަމުގައި އިތުރު ދެ ވަޤުފު އިމާރާތް އެޅުމުގެ މަސައްކަތް ކުރިއަށް ގެންދެވޭނެއެވެ.
"ދާރުއްސަލާމް" އިމާރާތް އެޅުމަށް ބިމެއް ހަމަޖެހި، "ދާރުލްއަރްޤަމް" އިމާރާތަށް ބިމެއް ހަމަޖައްސައި ރަޖިސްޓަރީ ކުރުމުގެ މަސައްކަތް އިސްލާމީ ކަންތައްތަކާ ބެހޭ ވުޒާރާއިން ކުރިއަށްދާ ކަމަށް ރައީސް ހާމަކުރެއްވިއެވެ.
މި އިމާރާތްތަކުގެ ބޭނުމަކީ ދީނީ ކަންކަން ކުރިއެރުވުމަށް ކުރަންޖެހޭ ހޭދައަށް މާލީ ފުދުންތެރިކަން އިތުރުކުރުން ކަމަށް ރައީސް ވިދާޅުވިއެވެ.
މިހާރު މާލޭގައި ހުރި "ދާރުލް އީމާން" އިމާރާތަށް އަހަރަކު ލިބެނީ ހައެއްކަ މިލިޔަން ރުފިޔާ ކަމަށާއި، އިތުރު އިމާރާތްތައް އެޅުމުން މި އާމްދަނީ އިތުރުވެގެންދާނެ ކަމަށް ރައީސް ފާހަގަކުރެއްވިއެވެ.
މީގެ އިތުރުން، ކީރިތި ޤުރްއާނާ ބެހޭ މަރުކަޒެއް އަލުން އިމާރާތްކުރުމަށް ބިމެއް ހަމަޖެހިގެންދާނެ ކަމަށްވެސް ރައީސް ހާމަކުރެއްވިއެވެ. މި ހުރިހާ މަޝްރޫޢުތަކަކީވެސް ކީރިތި ޤުރްއާނުގެ ޢިލްމު ކުރިއެރުވުމަށާއި، ޤުރްއާނާ ގުޅުންހުރި ޙަރަކާތްތައް ފުޅާކުރުމަށް ސަރުކާރުން ރާވާފައިވާ މުހިންމު ފިޔަވަޅުތަކެކެވެ.
Advertisement
This content is created and paid for by advertisers and does not involve Voice Journalists
