އަންނަ އަހަރުން ފެށިގެން ޤުރުއާން ހިތުދަސްކުރާ ހާފިޒުން ދަސްވެނިވުމަށް ޤައުމީ ފެންވަރުގެ ޚާއްޞަ ޙަފްލާއެއް ބާއްވާނެކަމުގައި އިސްލާމީ ކަންތައްތަކާބެހޭ ވަޒީރު ޑރ. ޝަހީމް ވިދާޅުވެއްޖެއެވެ.
ކީރިތި ޤުރުއާން ކިޔެވުމުގެ 36 ވަނަ ޤައުމީ މުބާރާތް ނިންމުމުގެ ޖަލްސާގައި ވާހަކަފުޅު ދައްކަވަމުން އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ އަންނަ އަހަރުން ފެށިގެން ޤުރުއާން ހިތުދަސްކުރާ ހާފިޒުން ދަސްވެނިވުމަށް ޤައުމީ ފެންވަރުގެ ޙަފްލާއެއް ބާއްވާނެ ކަމަށެވެ.
ޑރ. ޝަހީމް މިހެން ވިދާޅުވީ، މިހާތަނަށް ހާފިޒުންނަށް ޚާއްޞަ އެވޯޑު ދެމުން އައީ ޤުރުއާން ކިޔެވުމުގެ ޤައުމީ މުބާރާތުގެ އިނާމު ދިނުމުގެ ރަސްމިއްޔާތުގެ ތެރެއިންކަން ފާހަގަ ކުރައްވާ، މިގޮތަށް ދެ ހަރަކާތް އެއްކޮށް ގެންދާތީ އެއްވެސް ހަރަކާތަކަށް ޙައްޤު ޤަދަރު ނުދެވޭ ކަމަށް ވިދާޅުވަމުންނެވެ.
މީގެ އިތުރުން މިރޭގެ ޖަލްސާގައި، ޑރ.ޝަހީމް ވަނީ ކުރިއާ އަޅާބަލާއިރު މިހާރު ރާއްޖެއިން، ޤުރްއާން ހިތުދަސްކުރާ މީހުންގެ އަދަދު އިތުރުވަމުން ދާކަން ފާހަގަ ކުރައްވާފައެވެ.
"އެވޯޑު ދޭން ފެށީ އޭރު ކޮންމެ އަހަރަކު ވެސް ގުރުއާން ހިތުދަސްކުރާ ހާފިޒުން މަދުވުމުން. އަހަރަކު އެކެއް ނޫނީ ދެ މީހަކު މި ދަސްކުރަނީ. އެކަމަކު މިހާރު އެ އަދަދު ވަރަށް ބޮޑަށް އިތުރުވެއްޖެ،"
ޑރ.ޝަހީމް ވިދާޅުވިއެވެ.
އެގޮތުން ހަަމައެކަނި މި އަހަރުވެސް 32 މީހުން ޤުރުއާން ހިތުދަސްކޮށް ރައީސުލްޖުމްހޫރިއްޔާގެ އަތްޕުޅުން "ރަން ތާޖު" ހާސިލުކުރާ ކަން ޑރ. ޝަހީމް ވަނީ ފާހަގަކުރައްވާފައެވެ.
މީގެ އިތުރުން ޑރ.ޝަހީމް ވަނީ ރީތިކޮށް ޤުރްއާން ކިޔަވާ ޖީލެއް އުފެއްދުމާއެކު، އެއަށް ޢަމަލުކުރާ ކުދިންތަކެއް ބިނާކުރުމުގެ މުހިންމުކަން ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
