ފެންވަރު ރަނގަޅު ބޭސް، ބަލްކުކޮށް ގެންނަން ފެށުމުން، ބޭހުގެ އަގު ހެޔޮވެ، އާސަންދައިން ބޭހަށް ކުރާ ޚަރަދުވެސް ބޮޑުތަނުން ކުޑަވެގެންދާނެ ކަމަށް އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.

ސަރުކާރުން ޔޫއެންޑީޕީއާ ގުޅިގެން އެސްޓީއޯ މެދުވެރިކޮށް ޔޫރަޕުގައި ބޭނުންކުރާ ފެންވަރުގެ މޮޅު ބޭސް އެތެރެކޮށް އަގުތައް ކޮންޓްރޯލްކުރުމުގެ ސިޔާސަތު ތަންފީޒުކުރަން އިއްޔެ ވަނީ ފަށާފައެވެ. 

ޕީއެސްއެމް ރާއްޖެ މިއަދު ޕްރޮގްރާމްގައި މިކަމާއި ގުޅޭ ގޮތުން ވާހަކަ ދައްކަވަމުން ހީނާ ވިދާޅުވީ، ސަރުކާރުގެ ސިޔާސަތަކީ ކޮލިޓީ ބޭސް ހެޔޮ އަގުގައި ރައްޔިތުންނަށް ފޯރުކޮށްދެއްވުން ކަމަށެވެ. އަދި އެ ނިޒާމް އެފަދައިން ބައްޓަންވެގެން ދިޔުމަކީ ދައުލަތަށްވެސް ބޮޑު ލުޔެއް ލިބޭނެ ކަމެއް ކަމަށެވެ. 

އެގޮތުން ދައުލަތުން އާސަންދައަށް ކުރާ ޚަރަދު އަހަރުން އަހަރަށް އިތުރު ވަމުންދާއިރު އޭގެން ގާތްގަނޑަކަށް 50 އިންސައްތައަކީ ބޭހަށް ކުރާ ޚަރަދުކަން ފާހަގަކުރައްވައި ހީނާ ވިދާޅުވީ، ބަލްކުކޮށް ބޭސް ގެންނަން ފެށުމާއެކު، އާސަންދައިން ބޭހަށް ކުރާ ޚަރަދު ވަރަށް ބޮޑު ތަން ކުޑަކުރެވިގެންދާނެ ކަމަށެވެ.

ނަތީޖާއެއްގެ ގޮތުން، އާސަންދައިގެ ތެރޭގައި ހުރި ލީކޭޖްތައް ކުޑަކުރުމަށް ކުރެވޭ މަސައްކަތަށް ލުއިތަކެއް ލިބި، ދެމެހެއްޓެނިވި ގޮތެއްގައި އާސަންދަ ނިޒާމް ހިންގުމަށް މަގުތަކެއް ފަހިވެގެންދާނެ ކަމަށް އޭނާ ވިދާޅުވިއެވެ. 

އިއްޔެ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ނެރުނު ނޫސްބަޔާނެއްގައި ބުނެފައިވާ ގޮތުގައި، ސަރުކާރުން ފަށާފައިވާ މި ޕްރޮޖެކްޓްގެ ދަށުން ޕޫލް ޕްރޮކިއުމަންޓެއްގެ ތެރެއިން ބަލްކްކޮށް ބޭސް ގަނެ ރާއްޖެ ގެނައުމަށް ވަނީ ފަށާފައެވެ.

އެ ގޮތުން، މި ސިޔާސަތުގެ ދަށުން ރާއްޖެ އެތެރެކުރުމަށް ހުއްދަ ދެނީ ޑަބްލިއު.އެޗް.އޯ ލިސްޓެޑް ނުވަތަ ސްޓްރިންޖެންޓް ރެގިއުލޭޓަރީ އޮތޯރިޓީއެއްގައި ރަޖިސްޓަރީކޮށްފައިވާ، އަދި ޔޫއެންޑީޕީއާއި އެމްއެފްޑީއޭގެ ކޮލިޓީ މިންގަނޑުތަކުން ފާސްވާ ބޭސްތަކަށް ކަމަށްވެސް އެމްއެފްޑީއޭ އިން މައުލޫމާތު ދެއެވެ. 

އެމްއެފްޑީއޭ އިން އިތުރަށް ހާމަ ކުރެއްވި ގޮތުގައި، ޕްރޮޖެކްޓްގެ ދަށުން ގެނެވޭ ބޭސްތަކަކީ ސީދާ ބޭސް އުފައްދާ ކުންފުނިތަކުން ގަންނަ ބޭސްތަކެވެ. މިގޮތުން، ބޭހަށް ކުރާ ޚަރަދު ކުޑަވެ، ބޭހުގެ އަގު ތިރިކުރުމަށް މަގުފަހިވާނެއެވެ.

މި ސިޔާސަތު އިއްޔެއިން ފެށިގެން ތަންފީޒުކުރެވޭނެ ކަމަށް އެމްއެފްޑީއޭއިން ބުނެފައިވާއިރު، މި ސިޔާސަތު ތަންފީޒު ކުރަން ނިންމާފައިވަނީ ދެ މަރުޙަލާއަކަށް ބަހާލައިގެންނެވެ. އެގޮތުން އިއްޔެއިން ފެށިގެން އެސްޓީއޯ މެދުވެރިކޮށް ހޯލްސޭލްކޮށް އަދި ރީޓެއިލްކޮށް ފުރަތަމަ ތަޢާރަފުކުރެވޭ 7 ބޭސް ލިބެން ފަށާނެއެވެ.

މި ސިޔާސަތު ތަންފީޒު ކުރަން ފެށުމާއެކު، ނަތީޖާއެއްގެ ގޮތުން އާސަންދަ ނިޒާމުގެ ތެރޭގައި ހުރި ބޮޑެތި ލީކޭޖްތައް ހުއްޓުވި، ބޭހުގެ އަގު ކޮންޓްރޯލްކުރުމަށް މަގުފަހިވާނެ ކަމަށް އެމްއެފްޑީއޭއިން ބުނެފައިވެއެވެ. އަދި ބޭހަށް ކުރަންޖެހޭ ޚަރަދު ކުޑަވެ، ސިއްޙީ ނިޒާމު ހަރުދަނާކުރެވޭނެ ކަމަށްވެސް ބުނެފައިވެއެވެ.