އެއަރ އެރޭބިއާއިން ދިވެހިރާއްޖެއަށް ސީދާ ދަތުރުތައް ފެށުމަށް ނިންމައިފިއެވެ.
އެއަރ އެރޭބިއާ އިން މިއަދު އެކްސްގައި ކުރި ޕޯސްޓެއްގައި ބުނެފައިވަނީ އޮކްޓޯބަރު 27 ވަނަ ދުވަހުން ފެށިގެން ޝާރުޖާއިން މާލެއަށް ކޮންމެ ދުވަހަކު އެއް ފްލައިޓް އޮޕަރޭޓް ކުރާނެ ކަމަށެވެ.
އެއަރ އެރޭބިއާއިން މި ދަތުރުތައް ފެށުމާއެކު، ދިވެހިރާއްޖެއަށް ދަތުރުކުރުމަށް ޝައުގުވެރިވާ ފަސިންޖަރުންނަށް އިތުރު ފުރުސަތުތަކެއް ލިބިގެންދާނެއެވެ. އެއަރ އެރޭބިއާއިން އިތުރަށް ބުނެފައިވަނީ މި ދަތުރުތަކުގެ ޓިކެޓް މިހާރު ވިއްކަން ފަށައިފައިވާ ކަމަށާއި، އެ ކުންފުނީގެ ވެބްސައިޓް މެދުވެރިކޮށް ޓިކެޓް ގަނެވޭނެ ކަމަށެވެ.
އެއަރ އެރޭބިއާއަކީ ޔުނައިޓެޑް އެރަބް އެމިރޭޓްސްގެ ޝާރުޖާގައި އޮޕަރޭޓްކުރާ ލޯ ކޮސްޓް އެއަރލައިނެކެވެ. 2003 ވަނަ އަހަރު އުފެދުނު މި އެއަރލައިނަކީ މެދު އިރުމަތީގެ އެންމެ ބޮޑު ލޯ ކޮސްޓް އެއަރލައިނެވެ.
އެއަރ އެރޭބިއާއިން މިހާރު 170 އަށްވުރެ ގިނަ މަންޒިލަކަށް ދަތުރުކުރެއެވެ. އަދި މި އެއަރލައިނުގެ ފްލީޓްގައި 58 އެއަރބަސް A320 އާއި A321 މަތިންދާބޯޓު ހިމެނެއެވެ.
Advertisement
This content is created and paid for by advertisers and does not involve Voice Journalists
