މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމް.އެން.އެސް.ޑީ.އޭ) އާއި މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމް.އައި.ޓީ) އާ ދެމެދު، ޒުވާނުންގެ ހުނަރު ތަރައްޤީކުރުމުގެ ޕްރޮގްރާމްތައް ހިންގުމަށް އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައިވަނީ މި މަހުގެ 22 ވަނަ ދުވަހު، އެމް.އެން.އެސް.ޑީ.އޭ ގައި ބޭއްވުނު ޚާއްޞަ ރަސްމިއްޔާތެއްގައެވެ.

2008 ވަނަ އަހަރުން ފެށިގެން ޤައުމީ ފެންވަރުގައި ތަމްރީނު ޕްރޮގްރާމްތައް ހިންގަމުން އަންނަ އެމް.އައި.ޓީ އިން ވަނީ އެމް.އެން.އެސް.ޑީ.އޭ ގައި 47 ޕްރޮގްރާމެއް ރަޖިސްޓަރީ ކޮށްފައެވެ. މީގެ ކުރިން، 9 ޖޫން 2022 ގައި ސޮއިކުރެވުނު އެއްބަސްވުމުގެ ދަށުން ހިންގުނު ނެޝަނަލް އެޕްރެންޓިސްޝިޕް ޕްރޮގްރާމުން 361 ދަރިވަރުން ވަނީ ތަމްރީނު ފުރިހަމަކޮށްފައެވެ. އަދި 30 ޖަނަވަރީ 2023 ގައި ސޮއިކުރެވުނު އެއްބަސްވުމުގެ ދަށުން ހިންގުނު ނެޝަނަލް ޓްރޭޑް ޓެސްޓިންގ އެންޑް ސެޓިފިކޭޝަން ޕްރޮގްރާމުން 70 ދަރިވަރުން ވަނީ ސެޓިފިކެޓް ހާސިލުކޮށްފައެވެ.

Advertisement

އައު އެއްބަސްވުމުގެ ދަށުން، އެމް.އައި.ޓީ އިން ނެޝަނަލް އެޕްރެންޓިސްޝިޕް ޕްރޮގްރާމް ކުރިއަށް ގެންދިއުމާއެކު، ނެޝަނަލް ޓްރޭޑް ޓެސްޓިންގ އެންޑް ސެޓިފިކޭޝަންގެ ޓްރޭޑް ޓެސްޓް ސެންޓަރެއްގެ ގޮތުގައިވެސް މަސައްކަތްކުރާނެއެވެ.

މި އެއްބަސްވުމުގެ ސަބަބުން ޒުވާނުންނަށް އިތުރު ތަމްރީނު ފުރުސަތުތަކެއް ހުޅުވި، އެ ފަރާތްތަކުގެ ހުނަރު އިތުރަށް ތަރައްޤީކުރުމަށް މަގުފަހިވެގެންދާނެއެވެ.