ނިމިދިޔަ ފަސް އަހަރު ނިންމާލިއިރު، ފެނަކައަށް ބޭނުންވާ ވަރަށްވުރެ ތިން ގުނަ އިތުރަށް މުވައްޒަފުން ނަގާފައިވާ ކަމަށް ވިލިމާލޭ ދާއިރާގެ މެމްބަރު މުހައްމަދު އިސްމާޢީލް ވިދާޅުވެއްޖެއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި، އައްޑޫސިޓީން ކަރަންޓް ކެނޑޭ މައްސަލަ އާއި ގުޅިގެން ހުށަހެޅުނު ކުއްލި މައްސަލައަށް ބަހުސް ކުރައްވަމުން މުހައްމަދު އިސްމާއީލް ވިދާޅުވީ، އެ މައްސަލައަކީ ވަރަށް ޚައްސާސް މައްސަލައެއް ކަމަށެވެ. އަދި އެ މައްސަލަ، ހައްލުކުރުމަށް ނިމިދޔަ ފަސް އަހަރު އެއްވެސް ކަމެއް ކުރެވިފައި ހުރިތޯވެސް ބަލަންޖެހޭ ކަމަށް އޭނާ ވުދާޅުވިއެވެ. 

މުހައްމަދު އިސްމާޢީލް އިތުރަށް ވިދާޅުވީ، ރައީސް މުޢިއްޒު ވެރިކަމާއި ހަވާލުވެވަޑައިގެން ފުރަތަމަ ދުވަހުން ފެށިގެން އައްޑޫގެ ކަރަންޓްގެ މައްސަލައަށް ހައްލެއް ގެނައުމުގެ މަސައްކަތް ފެއްޓެވި ކަމަށެވެ.

މުހައްމަދު އިސްމާޢީލް ވިދާޅުވީ، ނިމިދިޔަ ފަސް އަހަރުގައި ފެނަކައިން ކުރި މަސައްކަތަކީ އެތަނުގެ އިސްވެރިންނާއި ގުޅުންހުރި ފަރާތްތަކަށް އިންޖީނުގެ އަޅަން ހަވާލުކުން ކަމަށާ، އެގޮތުން ފަންސާސް އެއްހާ އިންޖީނުގެ އަޅަން ހަވާލުކުރެވުނު ކަމަށެވެ. އަދި އިންޖީނުގެތަކުން ދެމުންދާ ޚިދުމަތްތައް ނުދީވެސް ކޮރަޕްޝަނުން ވެރިންގެ ޖީބުތައް ފުރުމަށް މަސައްކަތް ކޮށްފައުވާ ކަމަށް މުހައްމަދު ވިދާޅުވިއެވެ. 

ކުރީ ސަރުކާރުގައި ފެނަކައިން ވީ އިހުމާލުތައް ރަނގަޅުކޮށް، ކަންކަން ރަނގަޅުކުރަން މި ސަރުކާރުން މަސައްކަތް ކުރަން ފެށުމުން އެއީ ނުކުރާ ކަމެއް ކަމަށް ހެދުމަށް ކުއްލި މައްސަލަތައް ހުށަހަޅައި ވަގުތު ބޭކާރު ކުރަން އިދިކޮޅުން މަސައްކަތް ކުރާ ކަމަށާ، އެއީ ހިތާމަ ހުރި ކަމެއް ކަމަށް މުހައްމަދު ވިދާޅުވިއެވެ.