ތ. ކިނބިދޫގައި ރައްކާތެރިގޮތުގައި ކުނި މެނޭޖުކުރާ ނިޒާމެއް ޤާއިމްކޮށް ބޭނުންކުރަން ފަށައިފިއެވެ.
މި ނިޒާމް އިފްތިތާޙްކޮށްދެއްވީ ތިމާވެށްޓާއި ހަކަތައާބެހޭ ވަޒީރު ޠާރިޤް އިބްރާހީމެވެ.
މި ނިޒާމަކީ ސަރުކާރުން ކުރިއަށްގެންދާ 'މަގޭ ސާފު ރާއްޖެ' ޕްރޮގްރާމްގެ ދަށުން، ދިވެހި ދައުލަތުގެ ބަޖެޓާއި، ވަރލްޑް ބޭންކުގެ ހިލޭ އެހީގައި ޤާއިމްކުރި ނިޒާމެކެވެ.
ކިނބިދޫގައި ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު ޠާރިޤް އިބްރާހީމް ވިދާޅުވީ މިއީ ކުންޏާއި ވަޞީލަތް ރައްކާތެރިގޮތުގައި މެނޭޖުކުރާ މަރުކަޒެއްކަމަށެވެ. އަދި މި ނިޒާމް ޤާއިމްކުރެވިފައިވަނީ ރަށުގައި އުފެދޭ ތަފާތު ބާވަތްތަކުގެ ކުނި ވަކިން މެނޭޖުކުރެވޭނެ ގޮތަށްކަމަށް ވަޒީރު ވިދާޅުވިއެވެ.
ތިމާވެށްޓާއި ހަކަތައާބެހޭ ވުޒާރާއިން މަޢުލޫމާތު ދެއްވިގޮތުގައި މި ނިޒާމާއެކު ދުވާލަކު 200 ކިލޯގްރާމްގެ ފަނާވާ ޒާތުގެ ކުނި ޕްރޮސެސްކޮށް ކާދަށް ބަދަލުކުރެވޭނެ ބަޔޯ ވޭސްޓް ޓްރީޓްމަންޓް ސިސްޓަމެއް ޤާއިމްކުރެވިފައިވެއެވެ. އޭގެ ސަބަބުން އެންމެ 15 މިނެޓުގެ ތެރޭގައި ރޯ ކޮމްޕޯސްޓް ހެދި، 10 ދުވަހުގެ ތެރޭގައި ފުރިހަމައަށް ފައްކާވެފައިވާ ކާދު އުފެއްދޭނެއެވެ.
މި ނިޒާމް ޤާއިމްކުރުމާއެކު ކުނި މެނޭޖުކުރުމުގައި މަސައްކަތްކުރާ ހުރިހާ މުވައްޒަފުންނަށް ރައްކާތެރި އަދި ތަނަވަސް މާހައުލެއް ޤާއިމްކުރެވިފައިވާކަމަށް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
