އެހީ ޖަމިއްޔާއިން ޙާލުގައި ޖެހިފައިވާ އާއިލާތަކަށް އެހީތެރިވުމަށް "އަސާސީ 365" ނަމުގައި އައު މަޝްރޫޢެއް ފަށައިފިއެވެ.

މި މަޝްރޫޢުގެ ދަށުން، ދަތި ޙާލުގައި ދިރިއުޅެމުންދާ 365 އާއިލާއަކަށް މަހުން މަހަށް އަސާސީ ބޭނުންތަކުގެ ޕެކޭޖެއް ފޯރުކޮށްދެވޭނެއެވެ.

އެހީ ޖަމިއްޔާއިން މަޢުލޫމާތު ދެއްވާފައިވާ ގޮތުގައި، މި މަޝްރޫޢަކީ މެދުކެނޑުމެއްނެތި ޙާލުގައި ޖެހިފައިވާ އާއިލާތަކަށް އަސާސީ އެހީ ފޯރުކޮށްދިނުމުގެ މަސައްކަތް އިތުރަށް ފުޅާކުރުމަށް ފަށާފައިވާ މަޝްރޫޢެކެވެ.

މި މަޝްރޫޢުގެ ދަށުން އެހީ ހޯދުމަށް އެދޭ ފަރާތްތަކަށް އޮންލައިން ފޯމެއް މެދުވެރިކޮށް އެދެވޭނެއެވެ. ފޯމު ހުށަހަޅާ ތަރުތީބުން ޖަމިއްޔާގެ ޓީމުން ގުޅައި، ޙާލަތު ކަށަވަރުކުރުމަށްފަހު އެހީ ފޯރުކޮށްދޭނެއެވެ. އަދި ފުރަތަމަ ފިޔަވަހީގެ 365 އާއިލާގެ ރިކުއެސްޓް ލިބުމުން ވަގުތީގޮތުން ފޯމު ބަންދުކުރެވި، ދެން އޮންނަ ފިޔަވަހީގައި އަލުން ހުޅުވާލެވޭނެ ކަމަށް ޖަމިއްޔާއިން ބުނެފައިވެއެވެ.

މި މަޝްރޫޢާ ގުޅޭ އިތުރު މަޢުލޫމާތު ހޯދުމަށް 7803433 ނަންބަރާ ގުޅުމަށް އެހީ ޖަމިއްޔާއިން ވަނީ އެދިފައެވެ.