ކ.ގުރައިދޫ ފަޅު ކައިރިން ވެލި ނަގަމުންދާތީ ކައުންސިލުން ކަންބޮޑުވުން ފާޅުކޮށްފިއެވެ.

ކ.ގުރައިދޫ ކައުންސިލުން ނެރުނު ބަޔާނެއްގައި، ވަނީ އެރަށުގެ ހުޅަނގު ފަރާތު ފަޅުކައިރިން ބިން ހިއްކުމަށް ވެލި ނެގުމުގެ ސަބަބުން ތިމާވެށްޓަށާއި ފަތުރުވެރިކަމަށް ލިބެމުންދާ ގެއްލުންތަކާމެދު ކަންބޮޑުވުން ފާޅުކޮށްފައެވެ.

ކައުންސިލުން ބުނީ ކ.ގުރައިދޫގެ އިޚްތިޞާސް ހިނގާ ސަރަހައްދަކީ ހިމާޔަތްކުރެވިފައިވާ ޑައިވް ޕޮއިންޓްތަކާއި، ސްނޯކްލިން ޕޮއިންޓްތަކާއި، ސޭންޑް ބޭންކްތަކާއި މޫދުއަޑީގެ ރީތި މަންޒަރުތައް ހިމެނޭ، ފަތުރުވެރިންގެ މަޤްބޫލު މަންޒިލެއްކަމަށެވެ. އޭގެ ތެރޭގައި ކަނޑޫމާ ތިލައާއި، ގުރައިދޫ ކޯނަރ އަދި ރާޅާ އަޅާ ސަރަހައްދު ހިމެނެއެވެ.

ނަމަވެސް ފަތުރުވެރިކަމަށް ތަރައްޤީކުރުމަށް އެ ސަރަހައްދުގެ ފަޅުތައް ހަމަޖައްސާފައިވުމުގެ ސަބަބުން، ގުރައިދޫ ކައިރީގެ ގިނަ ފަޅުތަކެއް ހިއްކުމުގެ މަސައްކަތް ބާރަށް ކުރިއަށްދާ ކަމަށް ކައުންސިލުން ބުންޏެވެ. އަދި މި ފަޅުތައް ހިއްކުމަށް ބޭނުންވާ ވެލި ނަގަމުންދަނީ ގުރައިދޫގެ ހުޅަނގުފަރާތުން ފަޅުކައިރިން ކަމަށާއި، މިކަމުގެ ސަބަބުން ހިމާޔަތްކޮށްފައިވާ ފަޅުތަކާއި ގިރިތަކާއި ހާތަކަށް ލިބޭ ގެއްލުންތަކުގެ އިތުރުން ފަތުރުވެރިކަމާއި މަސްވެރިކަމަށްވެސް ނުހަނު ގިނަ ގެއްލުންތަކެއް ލިބެމުންދާކަން ކައުންސިލުން ފާހަގަކޮށްފައިވެއެވެ.

މި މައްސަލަ ކަމާބެހޭ ފަރާތްތަކުގެ ސަމާލުކަމަށް ގެނެސް، މިއީ ޚައްސާސީ މައްސަލައެއްގެ ގޮތުގައި ބެލުމަށް ކައުންސިލުން އެދިފައިވެއެވެ. އަދި މިކަން ވަގުތުން ހުއްޓާލުމަށް ބޯޓުގެ ވެރިފަރާތަށް އަންގާފައިވާ ކަމަށާއި، މި މައްސަލައަށް އަވަސް ހައްލެއް ނުލިބިއްޖެނަމަ ކައުންސިލާއި ރަށުގެ ރައްޔިތުން މިކަމާ ދެކޮޅަށް ނުކުމެ އިހުތިޖާޖު ކުރާނެ ކަމަށްވެސް ކައުންސިލުން ބުނެފައިވެއެވެ.