ސަރުކާރުން ޓެކްސީ ލައިނެއްގެ ޚިދުމަތްދޭން ފަށަން ނިންމައިފިއެވެ.

ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން މިކަން އިޢުލާންކޮށްފައިވަނީ، ރޭ މާލެ ފަހި ޕްރޮގްރާމް އިފްތިތާޙުކުރުމަށް ބޭއްވި ޖަލްސާގައެވެ.

އެ ވުޒާރާއިން ހާމަކުރިގޮތުގައި، ދުނިޔޭގެ ކުރިއަރާފައިވާ އެހެން ޤައުމުތަކެކޭ އެއްގޮތަށް ޒަމާނީ އަދި ސަލާމަތީ ގޮތުން ރައްކާތެރި އިތުބާރު ހިފޭ ޓެކްސީ ލައިންތައް ތައާރަފުކުރުމަކީ ސަރުކާރުން އިސްކަމެއް ދޭ ކަމެކެވެ.

Advertisement

އެހެންކަމުން، އެ ފަދަ ނިޒާމެއް ޤާއިމުކުރުމަށް، ޓެކްސީ ލައިންގެ ކާރުތައް ފްރީލާންސް އުސޫލުން ވަކި އެޕްލިކޭޝަނެއް މެދުވެރިކޮށް ކޮންޓްރޯލްކޮށް، ޝައުގުވެރިވާ ދިވެހިންނަށް ޓެކްސީ ދުއްވުމުގެ ފުރުސަތު ހުޅުވާލުމަށް ނިންމަވާފައިވާކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ބުންޏެވެ. 

މީގެ އިތުރުން ސަރުކާރުގެ ޓެކްސީ ލައިނަކީ ތިމާވެއްޓާ ރަށްޓެހި، މަދުވެގެން 25 އިންސައްތަ  އިލެކްޓްރިކް އުޅަންދު ބޭނުންކޮށްގެން ފަށާނެ ޓެކްސީ ލައިނެއްގެ ގޮތުގައި ހަމަޖެއްސުމަށް ސަރުކާރުން ނިންމަވާފއިވާ ކަމެއް ކަމަށްވެސް އެ ވުޒާރާއިން މައުލޫމާތުދެއެވެ.