ސަރުކާރުގެ އަމާޒަކީ ދައުލަތުގެ ކުންފުނިތައް ޒަމާނީ ފެންވަރަށް ބަދަލުކުރުން ކަމަށާއި، އެކަން އެމަގަށް ގެންދިއުމަށް ސަރުކާރުން މަސައްކަތްކުރަމުންދާ ކަމަށް އިޤްތިޞާދީ ވަޒީރު މުހައްމަދު ސަޢީދު ވިދާޅުވެއްޖެއެވެ.
ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން ސަޢީދު ވިދާޅުވީ މިފްކޯއާއި ފެނަކަ އަދި އެހެނިހެންވެސް ދައުލަތުގެ ކުންފުނިތައް ހަރުދަނާކޮށް ޒަމާނީ ފެންވަރަށް ބަދަލުކުރުމަށް މަސައްކަތް ކުރަމުން ދާ ކަމަށެވެ.
އަދި މި ކުންފުނިތައް ދެފުށް ފެންނަ، ބައިނަލްއަޤްވާމީ މާލީ އިދާރާތަކުން ޤަބޫލުކުރާ ފެންވަރުގެ ހިންގުންތެރި އަދި ފަންނީ މެނޭޖްމަންޓް ގަވަރނެންސްގެ ނިޒާމަކަށް ބަދަލުކުރުމަށް ސަރުކާރުން މަސައްކަތް ކުރަމުންދާކަން ފާހަގަކުރެއްވިއެވެ.
މި މަސައްކަތުގައި ހަމައެކަނި ދިވެހި ބޭފުޅުންގެ އިތުރުން، ބައިނަލްއަޤްވާމީ ތަޖުރިބާކާރުންގެ އެހީތެރިކަންވެސް ސަރުކާރުން ހޯއްދަވާނެ،
ވަޒީރު އިތުރަށް ވިދާޅުވިއެވެ.
ރައީސުލްޖުމްހޫރިއްޔާގެ އަމާޒަކީ މި ކުންފުނިތަކަކީ ރައްޔިތުންނާއި ބައިނަލްއަޤްވާމީ ދުނިޔޭގެ އިތުބާރު ލިބިފައިވާ، ދެފުށް ފެންނަ ކޯޕަރޭޓް ގަވަރނެންސްގެ އުސޫލުން ހިންގާ ޒަމާނީ ކުންފުނިތަކަކަށް ބަދަލުކުރުން ކަމަށްވެސް ވަޒީރު ވިދާޅުވިއެވެ.
މީގެ އިތުރުން އުވާލަންޖެހޭ ކުންފުންޏެއް އޮތްނަމަ އުވާލުމާއި، އެއްކޮށްލައިގެން ކުރިއަށް ގެންދެވޭނެ ކުންފުނިތައް އެގޮތަށް އެއްކޮށްލުމުގެ މަސައްކަތްވެސް ކުރިއަށް ގެންދާނެ ކަމަށް އިޤްތިޞާދީ ވަޒީރު ސަޢީދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
