"ވެލްކަމް އިންޑިއާ ރޯޑްޝޯ 2024" ގައި ބައިވެރިވެވަޑައިގަތުމަށް ފަތުރުވެރިކަމާ ބެހޭ ވަޒީރު އިބްރާހިމް ފައިސަލް އިންޑިއާގެ ވެރިރަށް ދިއްލީއަށް ވަޑައިގަތުމަށް ފުރާވަޑައިގެންފިއެވެ.

ވަޒީރު މިއަދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މި ރޯޑްޝޯގައި ދިވެހިރާއްޖެ ތަމްސީލުކުރާނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)، މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރސް (މާޓާޓޯ) އަދި ނޭޝަނަލް ހޮޓެލިއަރސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) އާ އެކުގައި ކަމަށެވެ.

"ވެލްކަމް އިންޑިއާ" ރޯޑްޝޯ އަކީ މި ޖުލައި މަހުގެ 30 ވަނަ ދުވަހުން އޮގަސްޓް 3 އާއި ހަމައަށް އިންޑިޔާގެ ދިއްލީ، މުމްބައި އަދި ބެންގަލޫރުގައި ކުރިއަށްގެންދިއުމަށް ހަމަޖެހިފައިވާ ރޯޑް ޝޯތަކެކެވެ.

މި ރޯޑްޝޯއަކީ ފައިދާހުރި އަދި ކާމިޔާބު ރޯޑްޝޯއަކަށް ވާނެކަމަށް އުންމީދު ކުރައްވާކަމަށް ވަޒީރު ވިދާޅުވިއެވެ.