ޤަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރަން ކުރިއަށް ގެންދާ ޚާއްސަ އޮޕެރޭޝަން، "އޮޕަރޭޝަން ކުރަނގި" ގެ މަސައްކަތް ލ.އަތޮޅުގައިވެސް ފަށައިފިއެވެ.

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މިއަދު އެކްސް ގައި ކުރެއްވި ޕޯސްޓެއްގައި ބުނެފައިވަނީ، ލ. އަތޮޅުގައި "އޮޕެރޭޝަން ކުރަނގި"ގެ ޢަމަލީ މަސައްކަތް ފަށާފައިވާކަމަށެވެ. 

ދާޚިލީ ސަލާމަތާއި ފަންނިއްޔާތާބެހޭ ވުޒާރާ އާއި ދިވެހި ފުލުހުންގެ ހިދުމަތާއި މޯލްޑިވްސް އިމިގްރޭޝަން ގުޅިގެން ހިންގާ މި ގައުމީ ހަރަކާތަކީ ރާއްޖޭގެ ހުރިހާ ރަށެއްގައިވެސް ކުރިއަށްގެންދިޔުމަށް ހަމަޖެހިފައިވާ ބޮޑު އޮޕެރޭޝަނެކެވެ.

އޮޕަރޭޝަން "ކުރަނގި" ރަސްމީ ގޮތެއްގައި، ފަށާފައިވަނީ މެއި މަހުގެ ދެވަނަ ދުވަހު ކ. ހިންމަފުށީގައެވެ. އެގޮތުން އެ ރަށުގައި ދިރިއުޅޭ 532 ބިދޭސީންގެ އިނގިލީގެ ނިޝާނާއި ފޭޝަލް ރެކޮގްނިޝަން ހަދަން ބޭނުންވާ ފޮޓޯ ނަގައި، ބިދޭސީ މަސައްކަތްތެރިންގެ މައުލޫމާތު ބަލަހައްޓާ ސިސްޓަމަށް އަޕްލޯޑްކޮށްފައިވާނެކަމަށް މީގެ ކުރިން ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ބުނެފައިވެއެވެ. 

ކ.ހިންމަފުށްޓަށް ފަހު ޖޫން މަހުގެ 13 ވަނަ ދުވަހު ކ.މާފުށީގައިވެސް އޮޕެރޭޝަން ކުރަނގި ފަށާފައިވާއިރު ޖޫން މަހުގެ 15 ވަނަ ދުވަހުގެ ނިޔަލަށް 805 ބިދޭސީންގެ މައުލޫމާތު ނަގާފައިވާކަމަށް ވުޒާރާއިން މައުލޫމާތު ދިނެވެ.

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާ މި އޮޕެރޭޝަނުގެ ފުރަތަމަ މަރުހަލާ ނިމުމަށްފަހު ރަސްމީ ލިޔެކިޔުން ނެތި، ގަވާއިދާއި ޚިލާފަށް އުޅޭ ބިދޭސީންގެ ބަޔޯ މެޓްރިކް އައިޑެންޓިފިކޭޝަނެއް ހަދައި، ގައުމުތަކުގެ އެމްބަސީތަކާއި ގުޅިގެން އެމީހުން ފޮނުވާލުމަށް ވަނީ ނިންމާފައެވެ.