ހައްދު ފަހަނަ އަޅާފައިވާ އިސްރާއީލުގެ ޔަހޫދީން ފަލަސްތީނުގެ ގައިދީންނަށް ހިންގަމުންދާ އަނިޔާވެރި އަމަލުތަކަކީ ހަނގުރާމައިގެ ކުށެއްކަމަށް އެމްނެސްޓީ އިންޓަނޭޝަނަލްއިން (އެމްނެސްޓީ) ބުނެފިއެވެ.
އެމްނެސްޓީ އިންޓަނޭޝަނަލް އިން މިހެން ބުނެފައި މިވަނީ އިސްރާއީލުގެ ދެކުނުގައި ހުންނަ ސްދޭ ޓެއިމަން ޖަލުގައި ބަންދުކޮށްފައި ތިބޭ ފަލަސްތީނު މީހުންނާމެދު އިސްރާއީލުން ހިންގާ އަނިޔާވެރި އަމަލުތަކެއްގެ ވާހަކަ މީޑިއާއަށް ފެންމަތިވެފައިވާ ދަނޑިވަޅެއްގައެވެ.
އިންސާނީ ހައްގުތަކަށް މަސައްކަތްކުރާ ބައިނަލްއަގްވާމީ ޖަމިއްޔާ އެމްނެސްޓީ އިންޓަނޭޝަނަލްގެ އިސް އޮފިޝަލެއްކަމަށްވާ އަދި މެދުއިރުމަތީ އަދި އުތުރު އެފްރިކާގެ ޑެޕިއުޓީ ރީޖަނަލް ޑިރެކްޓަރ ސާރާ ހަޝާޝް ވިދާޅުވީ، ސްދޭ ޓެއިމަން އަސްކަރީ ކޭމްޕާއި އެހެނިހެން ބަންދު މަރުކަޒުތަކުގައި ފަލަސްތީނުގެ ގައިދީންނާމެދު ހިންގާ އަނިޔާވެރި އަމަލުތަކާއި ނުރަނގަޅު ގޮތުގައި މުއާމަލާތްކުރާކަން އެމްނެސްޓީ އިންޓަނޭޝަނަލްއިން ފާހަގަކޮށްފައިވާ ކަމަށެވެ.
ހަނގުރާމައިގެ ހާލަތުގައި އަނިޔާވެރި އަމަލުތަކާއި ޖިންސީ އަނިޔާ ހިންގުމަކީ ހަނގުރާމައިގެ ކުށެއްކަމަށް ވެސް ސާރާ ހަޝާޝް ވިދާޅުވެފައިވެއެވެ.
އަދި މީގެ އިތުރުން ގާޒާ ސަރަހައްދުން އަތުލައިގަނެފައިވާ 27 މަދަނީ ފަރާތަކާ އެމްނެސްޓީ އިންޓަނޭޝަނަލްއިން އިންޓަވިއުކޮށްފައިވާ ކަމަށާއި، އޭގެ ތެރޭގައި 20 ފިރިހެނުންނާއި 6 އަންހެނުންނާއި އެއް ކުޑަކުއްޖެއް ހިމެނޭ ކަމަށް އޭނާ ވިދާޅުވިއެވެ.
މި މީހުން ބަންދުކޮށްފައި ބެހެއްޓީ އަސްކަރީ ނުވަތަ އިސްރާއީލް ޕްރިޒަން ސަރވިސްގެ ބަންދު މަރުކަޒުތަކުގައި 2 ހަފްތާއިން ފެށިގެން 140 ދުވަހުގެ މުއްދަތަށް ކަމަށް ސާރާ ވިދާޅުވިއެވެ.
ބަންދުގައި ތިބި މުއްދަތުގައި އިސްރާއީލުގެ އަސްކަރިއްޔާއާއި އިންޓެލިޖެންސް އަދި ފުލުހުންގެ ފަރާތުން އަނިޔާވެރި އަމަލުތަކާއި ލާއިންސާނީ އަމަލުތައް ހިންގާފައިވާކަމަށް މި ހުރިހާ މީހުން ވެސް ބުނެފައިވާ ކަމަށް ސާރާ ހަޝާޝް ވިދާޅުވިއެވެ.
މީގެ ދެދުވަސް ކުރިން ހައްދު ފަހަނަ އަޅާފައިވާ އިސްރާއީލުގެ ޖަލުން ގާޒާގެ 80 މީހަކުވަނީ މިނިވަން ކޮށްފައެވެ.
Advertisement
This content is created and paid for by advertisers and does not involve Voice Journalists
