ނިމިދިޔަ ސަރުކާރުން މައިގަނޑު ގޮތެއްގައި އިމާރާތް ކޮށްފައި ހުރީ ހޮސްޕިޓާތަކުގެ އޮފީސް ބައި ކަމަށާ، ނަމަވެސް މި ސަރުކާރުން ކުރާނީ ރައްޔިތުންނަށް ޚިދުމަތްދޭބައި ކަމަށް ސިއްހަތާބެހޭ ވަޒީރު ޑރ އަބްދުالله ޚަލީލް ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި މެންބަރުންގެ ސުވާލު ތަކަށް ޖަވާބު ދެއްވަމުން ވަޒީރު ވަނީ ރައްޔިތުން ޚިދުމަތް ހޯދުމަށް އަންނަ ތަނަކީ އައު ތަނަކަށް ވުމުގެ މުހިންމުކަން ފާހަގަކުރައްވާފައެވެ. އެހެންކަމުން މި ސަރުކާރުން އިކަމަށް ޚާއްސަ އިސްކަމެއް ދެއްވާނެ ކަމަށް ވަޒީރު ވިދާޅުވިއެވެ.
މައިގަނޑު ގޮތެއްގައި މިދިޔަސަރުކާރުން އިމާރާތް ކުރިއިރުގައި ހުރީ އޮފީސް އިމާރާތް ކޮށްފައި. އެއީ އަޅުގަނޑުމެންގެ ވަރަށް ބޮޑު ކަންބޮޑިވުމެއް. ޚިދުމަތްތަކެއް ދިނުމަށް ބަލާއިރު އަޅުގަނޑުމެންގެ ވިސްނުމަކީ، ރައްޔިތުން ޚިދުމަތް ހޯދަން އަންނަ އިމާރާތް ވާންވާނީ ޚިދުމަތްދޭ އެންމެ އައު އިމާރާތް ކަމަށް. އެހެންވީމާ ދެން ރަށްރަށުގައި އިމާރާތްކުރެވޭނީ ޚިދުމަތްދޭ އިމާރާތްތައް. އޭގެ މާނައަކީ ޑޮކްޓަރަށް ދައްކާ ފެސިލިޓީ ހުންނާނީ އެތަނުގައި. ލެބޯޓަރީ ހުންނާނީ އެތަނުގައި.
ސިއްހަތާބެހޭ ވަޒީރު ޑރ އަބްދުالله ޚަލީލް
ޚިދުމަތް ފޯރުކޮށްދިނުމަށް އައު އިމާރާތް އެޅުމަށްފަހު، ބައު އިމާރާތް ބޭނުން ކުރެވޭނީ އެހެނިހެން ޚިދުމަތްތަކަށް ކަމަށް ވަޒީރު ވިދާޅުވިއެވެ. އަދި ރައްޔިތުން ޚިދުމަތް ހޯދުމަށް ވަންނަ ތަނަކަށް އެ ފަދަ ބައު އިމާރާތް ނުވާނެ ކަމަށް ވެސް ވިދާޅުވިއެވެ.
މީގެ އިތުރުން، ހޮސްޕިޓާތަކާއި، ހެލްތު ސެންޓަރުތަކުގެ މަސައްކަތް ލަސްވާ ސަބަބަށް އަލިއަޅުވާލައްވައި ވާހަކަ ދައްކަވަމުން ވަޒީރު ވިދާޅުވީ، މައިގަނޑު ގޮތެއްގައި މަސައްކަތް ލަސްވަނީ ފައިސާ ދޫކުރުމުގައި ލަސްތަކެއް ވަމުންދާތީ ކަމަށެވެ. އޭގެ ސަބަބުން އެކަމުގެ ބުރަ ކޮންޓްރެކްޓަރުންނަށްވެސް އުފުލަންޖެހޭ ކަމަށްވެސް ވިދާލޫވިއެވެ.
އެހެންކަމުން، މި ސަރުކާރާއި ހަވާލުވުމަށްފަހު، ކޮންޓްރެކްޓަރުންނާއި ވަކިން ބައްދަލު ކުރެއްވުމަށްފަހު، ފައިސާ ދޫކުރުމުގެ ލުއިފަސޭހަ ގޮތްތަކެއް މަޝްވަރާކުރެވިފައިވާ ކަމަށް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
