ފަލަސްޡީނުގެ މިނިވަންކަމަށް ޖިހާދުކުރަމުންދާ ހަމާސް ޖަމާޢަތުގެ ސިޔާސީ ގޮފީގެ ލީޑާރު ޝަހީދު އިސްމާއިލް ހަނިއްޔާ ހުންނެވި މަގާމަށް ޔަހްޔާ ސިންވާރު ހަމަޖައްސަވައިފައިވާކަމަށް ހަމާސްއިން ބުނެފިއެވެ.

 ޣައްޒާގައި ދިރިއުޅުއްވާ ކޮމާންޑަރު ޔަހްޔާ ސިންވާރު އެ ޖަމާޢަތުގެ އައު ސިޔާސީ ލީޑަރުކަމަށް ހޮވާފައިވާކަން އިއުލާނު ކުރީ އަންގާރަ ދުވަހުގެރޭ ހަމާސް އިން ނެރުނު ބަޔާނެއްގައެވެ.

ކޮމާންޑަރު ޔަހްޔާ ސިންވާރު އެ ޖަމާޢަތުގެ އައު ސިޔާސީ ލީޑަރުކަމަށް ހޮވާފައިވަނީ ޝަހީދު އިސްމާޢީލް ހަނިއްޔާ އީރާނުގެ ވެރިރަށް ތެހުރާނުގައި ހުންނަކަވިކޮށް ހައްދުފަހަނަ އަޅާފައިވާ އިސްރާއީލުގެ ޔަހޫދީން ދިން ހަމަލާއެއްގައި ޝަހީދުވުމާގުޅިގެންނެވެ.

ހަނިއްޔާ ޝަހީދުކޮށްލީ ޖުލައި 31 ވަނަ ދުވަހުގެ ފަތިހު އޭނާ ދިރިއުޅުނު ގެއަށް ދިން ހަމަލާއެއްގައެވެ. މިހަމަލާ ދީފައިވަނީ އީރާނުގެ އަލަށް އިންތިޚާބުވި ރައީސް މަސްޢޫދު ޕެޒެޝްކިއަންގެ ހުވާކުރުމުގެ ރަސްމިއްޔާތުގައި ބައިވެރިވުމަށް ތެހުރާނަށް ހަނިއްޔާ ވަޑައިގަތުމުންނެވެ.

މިއީ 2023 ވަނަ އަހަރުގެ އޮކްޓޯބަރު 7 ގައި ފެށުނު އަޤްޞާ ފްލަޑް އޮޕަރޭޝަނަށްފަހު އިސްރާއީލުން ޝަހީދުކޮށްލި ހަމާސްގެ ދެވަނަ އިސްލީޑަރެވެ. ފުރަތަމަ ލީޑަރަކީ ޝަހީދުކޮށްލީ 2024 ވަނަ އަހަރުގެ ޖެނުއަރީ 2 ގައި ބައިރޫތުގެ ދެކުނުގައި ދިންހަމަލާއެއްގައެވެ. އެއީ ހަމާސްގެ ސިޔާސީ ޖަމާއަތުގެ މެންބަރެއްކަމުގައިވާ ޞަލާޙް އަލް-އަރޫރީއެވެ.

ހަމާސްގެ އިސް އަސްކަރީ ކޮމާންޑަރު ޔަޙްޔާ ސިންވާރުއަކީ އޮކްޓޯބަރު 7 ވަނަ ދުވަހު ހަމާސްއިން އިސްރާއީލަށް ދިން ހަމަލާ ކަމަށްވާ އަޤްޞާ ފްލަޑް އޮޕަރޭޝަންގެ މައިގަނޑު ފަރުމާކުރި ފަރާތްތަކުގެ ތެރެއިން އެންމެ އިސް އެކެކެވެ.