ފަސޭހައިން ޤާނޫނުއަސާސީ އިސްލާހު ނުކުރެވޭނެ ގޮތެއް ހެދުމަކީ މުހިިންމު ކަމެއްކަމަށް މާމިގިލީ ދާއިރާގެ މެންބަރު ޤާސިމް އިބްރާހިމް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން، ޤާސިމް ވިދާޅުވީ، ރާއްޖޭގައި މިހާރު އަމަލު ކިރެވެމުންދާ ޤާނޫނުއަސާސީއަށް މިއަދު 16 އަހަރު ފުރޭއިރު. އެ ގާނުނު އަސާސީ އެކުލަވައިލެވުނު ފަހުން ދެ ފަގަރެއްގެ މަތީން ގާނުނު އިސްލާހުކުރެވިފައިވާ ކަމަށެވެ.

އަދި އެކަން ކޮށްފައިވަނީ ވަރަށް ފަސޭހަކަމާއެކުކަން ފާހަގަކުރައްވައި އޭނާވަނީ ކުރިން އެހާ ފަސޭހައިން ޤާނޫނުއަސާސީ ބަދަލުނުކުރެވޭ ކަމަށް ވިދާޅުވެފައެވެ.

ޤާސިމް ވިދާޅުވީ މަޖިލީހުގެ 75 އިންސައްތަ ވޯޓުން ޤާނޫނުއަސާސީ އިސްލާހުކުރެވޭ ގޮތަށް އޮންނަނަމަ އޭގެން ނުރަނގަޅު ނަތީޖާއެއް ނުކުމެދާނެ ކަމަށެވެ.

އެހާ ފަސޭހައިން ޤާނޫނުއަސާސީއަށް އިސްލާހު ނުގެނެވޭނެ ގޮތަށް ހަދަންޖެހެނީ، ބަޔަކަށް މަޖިލީހުގެ މެޖޯރިޓީ ލިބި، ޤާނޫނުއަސާސީގައިވާ އަސާސީ ހައްޤުތަަކަށް ނުވަތަ އެހެންވެސް މުހިންމު މާއްދާތަަކަށް ބަދަލެއް ގެނެސްފާނެތީކަމަށް ޤާސިމް ވިދާޅުވިއެވެ. އެގޮތުން ރާއްޖޭގެ ދީނަކީ އިސްލާމްދީން ކަން ކަނޑައަޅާފައިވާ މާއްދާ ފަދަ މާއްދާއަށް ބަދަލެއް ގެނައުމުގެ ފުރުސަތު އޮތްކަން އޭނާ ފާހަަގަ ކުރެއްވއިެވެ.

މިހާރު އަމަލުކުރަމުންދާ ޤާނޫނުއަސާސީ އެކުލަވައިލުމުގެ މަސައްކަތް ރައްޔިތުންގެ ޚާއްސަ މަޖިލީހުން ފެށީ 2004 ވަނަ އަހަރުއެވެ. އެ މަސައްކަތް ނިންމާލުމަށްފަހު، އެ ޤާނޫނުއަސާސީ ތަސްދީޤުކޮށްފައިވަނީ 7 އޯގަސްޓް 2008ގައެވެ. އެ މަސައްކަތް ކުރެވުނު އިރު ޚާއްސަ މަޖިލީހުގެ ރިޔާސަތު ބެލެހެއްޓެވީ ގާސިމެވެ.