މަސްތުވާތަކެއްޗާއެކު މަޑަވެލި އަންހެނަކު އެއާޕޯޓުން ހައްޔަރުކޮށްފިއެވެ.

ވެލާނާ އިންޓަނޭޝަނަލް އެއާޕޯޓުގެ ޑޮމެސްޓިކް ޓާމިނަލުން ފުރަން ދިޔަ 30 އަހަރުގެ ދިވެހި އެ އަންހެން މީހާ  މަސްތުވާތަކެއްޗާއެކު  ރޭގެ ވަގުތެއްގައި ހައްޔަރުކޮށްފިކަން ފުލުހުން ވަނީ ކަށަވަރު ކޮށްދީފައެވެ.

މި މައްސަލައިގައި ހައްޔަރުކުރެވުނު މީހާއަކީ ގދ. މަޑަވެލި / އުދަރެސް ސަހާ ވަހީދު (30 އަހަރު) އެވެ.

Advertisement

ފުލުހުން ވިދާޅުވީ މި އަންހެން މީހާ ބަލައިފާސްކުރުމުން މަސްތުވާތަކެތި ކަމަށް ބެލެވޭ އެއްޗެއް ހުރި ދެ ރަބަރު ޕެކެޓު ފެނިފައިވާ ކަމަށެވެ. އަދި މި ތަކެތީގެ ވަގުތީ ބަރުދަނަކީ 209 ގްރާމެވެ.

މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ފަސްދުވަހަށް ބަންދުކުރުމަށް އަމުރުކޮށްފައިވެއެވެ.

މި މައްސަލަ މިހާރު ދަނީ ޑްރަގް އެންފޯސްމަންޓުން ތަޙުޤީޤުކުރަމުންނެވެ.

އެއާޕޯޓުތަކުގައި މަސްތުވާތަކެތި ގެންގުޅޭ މީހުން ހޯދުމަށް ސަލާމަތީ ބާރުތަކުން ދަނީ ވަރަށް ބޮޑު ސަމާލުކަމެއް ދެމުންނެވެ. އެގޮތުން މިފަހަކަށް އައިސް ގިނަޢަދަދެއްގެ މަސްތުވާތަކެތި އަތުލައިގެންފައިވާ ކަން ފާހަގަކޮށްލަން ޖެހެއެވެ.