ޖަލުތަކަށް މަސްތުވާތަކެތި ވެއްދިކަމުގެ ތުހުމަތުގައި ހައްޔަރުކުރެވުނު 13 އޮފިސަރުންނަށް ދައުވާކުރަން ފޮނުވައިފިއެވެ.
ފުލުހުން މިއަދު ވިދާޅުވީ މޯލްޑިވްސް ކަރެކްޝަނަލް ސާވިސަސްގެ 13 އޮފިސަރުންގެ މައްސަލަ ތަހުގީގުކޮށް ނިންމުމަށްފަހު، ޕްރޮސެކިއުޓަރ ޖެނެރަލްގެ އޮފީހަށް މިއަދު ފޮނުވާފައިވާކަމަށެވެ.
މި މައްސަލައިގައި ހައްޔަރުކުރެވުނު 13 މީހުންގެ ތެރޭގައި ހިމެނެނީ މާފުށީ ޖަލުން ހައްޔަރުކުރެވުނު 9 މީހުންނާއި، ކ. ކާށިދޫއިން ހައްޔަރުކުރެވުނު 2 މީހުންނާއި، ހއ. އުތީމުން ހައްޔަރުކުރެވުނު މީހަކާއި، މާލެއިން ހައްޔަރުކުރެވުނު މީހެކެވެ. މި އޮފިސަރުން ހައްޔަރުކުރެވިފައިވަނީ ފައިސާގެ ބޭނުމުގައި ޖަލަށް މަނާ ތަކެތި ވައްދައިދިނުމުގެ ތުހުމަތުގައެވެ.
ހައްޔަރުކުރި އޮފިސަރުން -- ފޮޓޯ: ފުލުހުން
2023 ވަނަ އަހަރު ކަރެކްޝަންސްގެ 18 މުވައްޒަފެއްގެ އެކައުންޓަށް ގައިދީންގެ އެކައުންޓުތަކުން ޖުމްލަ 73،600،000 ރުފިޔާ ދައުރުކޮށްފައިވާކަމަށް ފުލުހުން ވަނީ ހާމަކޮށްފައެވެ. މީގެ ތެރެއިން 6 މުވައްޒަފުން މިހާރު ވަނީ ކަރެކްޝަންސްގެ ވަޒީފާއިން ވަކިވެފައެވެ.
މި މައްސަލައާ ގުޅިގެން ހޯމް މިނިސްޓަރު އަލީ އިހުސާން ވިދާޅުވެފައިވަނީ، ވަޒީފާއިން ވަކިވެފައިވީ ނަމަވެސް، ކޮށްފައިވާ ކުށަށް ގާނޫނުން ކަނޑައެޅިފައިވާ އަދަބު ލިބޭނެ ކަމަށެވެ. އަދި މި މައްސަލައިގައި އެއްވެސް މީހަކަށް އިސްތިސްނާއެއް ނުދެވޭނެ ކަމަށާއި، ތަހުގީގުގެ ދަށުން އެޅެން އޮތް އެންމެ ހަރުކަށި ފިޔަވަޅުތައް އަޅާނެ ކަމަށް އޭނާ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
