ނިރުބަވެރި އިސްރާއީލުން ޣައްޒާގެ އެކި ސަރަހައްދުތަކަށް ދެމުން އަންނަ ހަމަލާތަކުގައި މިހާތަނަށް ޝަހީދުކޮށްލި މީހުންގެ އަދަދު 40،000 އާއި ގާތްވެއްޖެއެވެ.

ޣައްޒާގެ ހެލްތް މިނިސްޓްރީން އާންމު ކޮށްފައިވާ އެންމެ ފަހުގެ ތަފާސް ހިސާބުތަކުން ދައްކާ ގޮތުގައި މިހާތަނަށް ޝަހީދުކޮށްލި މީހުންގެ އަދަދު 39،790 އަށް އަރާފައިވެއެވެ.

މިދިޔަ އޮކްޓޯބަރު މަހުގެ 7 ވަނަ ދުވަހު ފަލަސްތީނުގެ ޣައްޒާއަށް އިސްރާއީލުން ހަމަލާތަކެއް ދޭން ފަށާފައިވަނީ، ހަމާސް ޖަމާއަތުގެ މުޖާހިދުން އިސްރާއީލަށް އަމާޒުކޮށް ވަރުގަދަ ހަމަލާތަކެއް ދިނުމުން ބަދަލު ހިފުމުގެ ގޮތުންނެވެ. އެންމެ ފުރަތަމަ ރޮކެޓް އާއި މިސައިލް ފަދަ ތަކެތި ބޭނުން ކޮށްގެން ހަމަލާތަކެއް ދޭން ފެށި ނަމަވެސް، އޭގެ ފަހުން ވަނީ އެއްގަމު މަގުން ޣައްޒާއަށް ވަދެ ހަމަލާތަކެއް ދޭން ފަށާފައެވެ.

ފާއިތުވި 24 ގަޑިއިރު ތެރޭގައި އިސްރާއީލުން ވަނީ ޣައްޒާގެ 40 މީހުން ޝަހީދުކޮށްލައި، 140 އަށްވުރެ ގިނަ މީހުންނަށް އެކިވަރުގެ ޒަހަމްތައް ދީފައެވެ. މިހާތަނަށް އެކިވަރުގެ ޒަހަމްތައް ލިބުނު މީހުންގެ އަދަދު 91،702 އަށް އަރާފައިވާ ކަމަށް ޣައްޒާގެ ހެލްތް މިނިސްޓްރީން ވަނީ ބުނެފައެވެ.

ޣައްޒާއިން ކޮންމެ ދުވަހަކު ޝަހީދުކޮށްލާ މީހުންގެ އަދަދު އިތުރުވަމުން އަންނައިރު، އިސްރާއީލުން ބުނަމުން އަންނަނީ އެމީހުންގެ ހަމަލާތަކަކީ އާންމުންނަށް އަމާޒުކޮށްގެން ދޭ ހަމަލާތަކެއް ނޫން ކަމަށާއި އެ ހަމަލާތަކަކީ ހަމާސް ޖަމާއަތުގެ މީހުންނާއި ދެކޮޅަށް ދެމުން އަންނަ ހަމަލާތަކެއް ކަމަށެވެ. ނަމަވެސް ޝަހީދުވާ މީހުންގެ ތެރޭގައި ގިނައީ އަންހެނުންނާއި ކުޑަކުދިންކަން ފާހަގަކުރެވެއެވެ.