ގެދޮރުވެރިޔާ ސްކީމްގެ ދަށުން ދޫކުރަން ނިންމާފައިވާ 4،000 ފުލެޓަށް ހުށަހަޅާފައިވާ ފަރާތްތަކުގެ ތެރެއިން ގޯސްކޮށް އެޕްލިކޭޝަން ހުށަހަޅާފައިވާ ފަރާތްތަކަށް ފްލެޓް ޙައްޤުވާނެކަމަށް ދެކެވަޑައި ނުގަންނަވާ ކަމުގައި މާލޭ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ. 

މިއަދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލެސިޓީ ކައުންސިލާއެކު ބޭއްވި ރަސްމީ ބައްދަލުވުމުގައި ވާހަކަދައްކަވަމުން އާޒިމް ވިދާޅުވީ، ފްލެޓް ތަކުގެ ކަންކަން ވީހާވެސް އަވަހަށް ނިމި މައްސަލައެއް ނެތް ފްލެޓްވެރިންނަށް ފްލެޓް ލިބުމަކީ ވަރަށް ބޮޑަށް އެދިލައްވާ ކަމެއްކަމަށެވެ. އަދި ފްލެޓަށް ހުށަހެޅި ފަރާތްތަކުގެ ތެރެއިން ގޯސް މަޢުލޫމާތު ފޯމުގައި ހިމެނި ފަރާތްތަކަށް ފްލެޓް ޙައްޤުވާކަމަށް ޚުދު އޭނާ ވެސް ދެކެވަޑައި ނުގަންނަވާކަމަށެވެ.

އެންޓި ކޮރަޕްޝަން ކޮމިޝަނުން ނެރުނު ރިޕޯޓެއްގައި ބުނެފައިވަނީ މިދިޔަ ސަރުކާރުގެ ދުވަސްވަރު ފެށި ގެދޮރުވެރިޔާ ސްކީމްގެ ފްލެޓް ލިބުނު މީހުންގެ ތެރެއިން 59% މީހުންނަކީ ޝަރުތު ހަމަނުވާ މީހުންކަމަށެވެ. އަދި ފްލެޓް ލިބޭ މީހުންގެ ތެރެއިން އެއްވެސް މައްސަލައެއް ނޫޅެނީ 20% މީހުންކަމަށް އޭސީސީން ބުނެފައިވެއެވެ.

ނިމިގެންދިޔަ ރައްޔިތުންގެ މަޖިލީހުގައި އެމްޑީޕީގެ އަޢުލަބިއްޔަތާއެކު ވަނީ ފްލެޓް ލިސްޓް އޮތްގޮތަށް އެއްވެސް ބަދަލެއް ނުގެނެސް ފްލެޓްތައް މީހުންނާ ހަވާލުކުރުމަށް ސަރުކާރަށް އެންގުމަށް ފާސްކޮށްފައެވެ. ސަރުކާރުން ބުނެފައިވަނީ އޭސީސީގެ ރިޕޯޓް ބޮލާލައި ޖަހައި ފްލެޓްތައް ދޫކޮށްފިނަމަ ގިނަ ބައެއްގެ ޙައްޤުތައް ގެއްލިދާނެކަމަށެވެ.