ހަނގުރާމައިގެ ސަބަބުން ދެކުނު ހުޅަނގު ގައްޒާގައި ފަލަސްތީނުގެ 75,000 އަށްވުރެ ގިނަ މީހުން ގެދޮރު ދޫކޮށް ހިނގައްޖެ ކަމުގައި އދ.އިން ބުނެފިއެވެ.

އދ. ގެ ފަލަސްޠީނު ރެފިއުޖީންނާބެހޭ އޭޖެންސީ (އަންރުވާ) ގެ ވެރިޔާ ފިލިޕް ލަޒަރީނީ ވިދާޅުވެފައިވަނީ ފާއިތުވި ދުވަސްތަކުގެ ތެރޭގައި ދެކުނު ހުޅަނގު ގައްޒާގައި 75,000 އަށްވުރެ ގިނަ ފަލަސްޠީނުން ގެދޮރު ދޫކޮށް ހިޖުރަކޮށްފައިވާ ކަމަށެވެ.

އެކްސް (ކުރީގެ ޓްވިޓަރ) ގައި ޝާއިޢުކުރެއްވި މެސެޖެއްގައި ލަޒަރީނީ ވިދާޅުވެފައިވަނީ އިސްރާއީލުގެ ފަރާތުން އިތުރު މީހުން ހުސްކުރުމުގެ އޯޑަރުތަކެއް ނެރެ، އިތުރު ބަޔަކު ގެދޮރު ދޫކޮށް ދިއުމަށް މަޖުބޫރުކުރުވަމުންދާ ކަމަށެވެ. އަދި ގެދޮރު ދޫކޮށް ދާ މީހުންގެ ތެރެއިން ބައެއް މީހުންނަށް ގެންދެވެނީ އެމީހުންގެ ހަމައެކަނި ދަރިން ކަމަށާއި، އަނެއްބައި މީހުންނަށް ގެންދެވެނީ އެމީހުންގެ މުޅި ޙަޔާތް ކުޑަ ދަބަހެއްގައި ބަންދުކޮށްގެން ކަމަށް ވިދާޅުވިއެވެ.

Advertisement

ލަޒަރީނީ އިތުރަށް ވިދާޅުވެފައިވަނީ ގެދޮރު ދޫކޮށް ދާ މީހުން ދަނީ މިހާރުވެސް ފޭލިގެތައް މީހުންނާއި ޢާއިލާތަކުން ފުރިފައިވާ ތަންތަނަށް ކަމަށާއި، އެމީހުން ވަނީ ހުރިހާ އެއްޗެއް ގެއްލި، ހުރިހާ އެއްޗަކަށް ބޭނުން ޖެހިފައި ކަމަށެވެ. އަދި އެހެން ހަނގުރާމަތަކާ ޚިލާފަށް ޣައްޒާގެ މީހުންނަށް ވަނީ ދާނެ ތަނެއް ނެތި ހިފެހެއްޓިފައި ކަމަށްވެސް އޭނާ ވިދާޅުވިއެވެ.

އިސްރާއީލުގެ ސިފައިން އިއްޔެ ރޭ އަދި މިއަދު ހެނދުނު ވަނީ ޣައްޒާގެ ދެކުނުގައި އޮންނަ ޚާން ޔޫނިސްގެ "ހިއުމެނިޓޭރިއަން ސޭފް ޒޯން" އިން ވެސް މީހުން ހުސްކުރުމުގެ އޯޑަރުތަކެއް ނެރެފައެވެ.

މިއީ ގާތްގަނޑަކަށް ހަފްތާއެއްގެ ތެރޭގައި ޚާން ޔޫނިސްގައި އިސްރާއީލުން މީހުން ހުސްކުރުމުގެ އޯޑަރުތައް ނެރުނު ތިންވަނަ ފަހަރެވެ. އިސްރާއީލުން ވަނީ ހުކުރު ދުވަހު ޚާން ޔޫނިސްގައި ސިފައިންގެ އޮޕަރޭޝަނެއް ފެށިކަން އިޢުލާންކޮށްފައެވެ.