ދިވެހިރާއްޖޭގެ ޚާރިޖީ ވަޒީރު މޫސާ ޒަމީރު މިއަދު ރަސްމީ ދަތުރުފުޅެއްގައި ބަހުރެއިނަށް ފުރާވަޑައިގެންފިއެވެ. މި ދަތުރުފުޅަކީ ބަހުރެއިނުގެ ޚާރިޖީ ވަޒީރު ޑރ. އަބްދުއްލަޠީފް ބިން ރަޝީދު އަލް ޒަޔާނީގެ ދަޢުވަތަކަށް ކުރައްވާ ދަތުރުފުޅެކެވެ.

މި ދަތުރުފުޅުގައި ވަޒީރު ޒަމީރު ބަހުރެއިނުގެ ޚާރިޖީ ވަޒީރާ ބައްދަލުކުރައްވައި، ދެ ޤައުމުގެ ދެމެދުގައި އޮތް ދިގު މުއްދަތުގެ ގުޅުން މުރާޖަޢާކުރައްވައި، ދެ ޤައުމަށް ފައިދާހުރި ދާއިރާތަކުން އިތުރަށް އެއްބާރުލުން ދެވިދާނެ ގޮތްތަކާ މެދު މަޝްވަރާކުރައްވާނެއެވެ. މިއަހަރަކީ ދިވެހިރާއްޖެއާއި ބަހުރެއިނާ ދެމެދު ޑިޕްލޮމެޓިކް ގުޅުން ޤާއިމުކުރިތާ 44 އަހަރު ފުރޭ އަހަރެވެ.

މީގެ އިތުރުން، ވަޒީރު ޒަމީރު ބަހުރެއިނު ސަރުކާރުގެ އިސް ބޭފުޅުންނާވެސް ބައްދަލުކުރައްވާނެއެވެ. މީގެ ތެރޭގައި މާލިއްޔާ އަދި ޤައުމީ އިޤްތިޞާދުގެ ވަޒީރު، ތެލާއި ތިމާވެށީގެ ވަޒީރު އަދި ފަތުރުވެރިކަމުގެ ވަޒީރާ ބައްދަލުކުރައްވައި، އެކި ދާއިރާތަކުން ދެ ޤައުމުގެ ދެމެދުގައި އެއްބާރުލުން އިތުރުކުރެވިދާނެ ގޮތްތަކާ މެދު މަޝްވަރާކުރައްވާނެއެވެ.

11 އޯގަސްޓުން 15 އޯގަސްޓަށް ހަމަޖެހިފައިވާ މި ދަތުރުފުޅުގައި ވަޒީރު ޒަމީރުގެ އަރިހުގައި އެމްބެސެޑަރ އެޓް ލާޖް އަޙްމަދު ނަޞީރު، ސެކްރެޓަރީ، ބައިލެޓަރަލް ޑރ. ޙާލާ ޙަމީދު، ޖޮއިންޓް ސެކްރެޓަރީ މަރްޔަމް ރީޝާ އަދި އެސިސްޓަންޓް ޑިރެކްޓަރ މިޒްނާ ވަޙީދު ބައިވެރިވެވަޑައިގަންނަވައެވެ.

ޚާރިޖީ ވަޒީރުގެ މި ދަތުރުފުޅަކީ ރާއްޖެއާއި ބަހުރެއިނާ ދެމެދު ދިގު މުއްދަތެއްގެ ތެރޭގައި ބިނާވެފައިވާ ރަޙްމަތްތެރިކަމުގެ ގުޅުން އިތުރަށް ފުޅާކުރުމަށް މަގުފަހިވެގެންދާނެ ދަތުރުފުޅެއް ކަމަށް ފޮރިންމިނިސްޓްރީން މައުލޫމާތު ދެއްވައެވެ.