ރައްޔިތުންގެ މަޖިލީހުގެ މާލިއްޔަތު ކޮމިޓީން ސަރުކާރުގެ ކުންފުނިތަކުގައި ކޮރަޕްޝަންގެ މައްސަލަތަކުގައި ތުހުމަތުވާ މުވައްޒަފުން ވަގުތުން ވަކިކުރެވޭނެ ގޮތަށް ހިއުމަން ރިސޯސަސް އޮނިގަނޑަށް ބަދަލު ގެނައުމަށް ސަރުކާރަށް ލަފާދޭން ނިންމައިފިއެވެ.
މި ނިންމުން ނިންމީ މިއަދު ބޭއްވުނު މާލިއްޔަތު ކޮމިޓީގެ ބައްދަލުވުމުގައި ހާޒިރުވި މެންބަރުންގެ އިއްތިފާގުންނެވެ. މި ހުށަހެޅުން ހުށަހެޅުއްވީ މަޖިލީހުގެ ނައިބު ރައީސް އަހްމަދު ނާޒިމެވެ. އަދި މި ހުށަހެޅުމަށް ތާއީދު ކުރެއްވީ ހަނިމާދޫ ދާއިރާގެ އެމްޑީޕީ މެންބަރު އަބްދުލްޣަފޫރު މޫސާއެވެ.
ނާޒިމްގެ ހުށަހެޅުމުގައި ވަނީ އެންޓި ކޮރަޕްޝަން ކޮމިޝަން (އޭސީސީ) އަށް މައްސަލައެއް ހުށަހެޅި، އެ މައްސަލައެއް ތަހުގީގު ކުރަން ކޮމިޝަނުން އަންގާ ހިސާބުން އެ މައްސަލައެއްގައި ތުހުމަތު ކުރެވޭ މުވައްޒަފު ވަގުތުން ވަކިކުރެވޭ ގޮތަށް މުވައްޒަފުންގެ އޮނިގަނޑު ބަދަލު ކުރުމަށެވެ.
ނާޒިމް ވިދާޅުވި ގޮތުގައި އޭސީސީގެ ތަހުގީގު ނިމެންދެން ވަޒީފާގައި ބެހެއްޓުމުން ކޮރަޕްޝަންގެ އިތުރު އަމަލުތައް ހިންގަން އެފަދަ މުވައްޒަފުންނަށް ޖާގަ ލިބެއެވެ. ސަރުކާރުގެ ކުންފުނިތަކުން ކޮރަޕްޝަންގެ އަމަލުތައް ހިންގާ ވާހަކައަކީ އަބަދުވެސް ދެކެވޭ ވާހަކައެއް ނަމަވެސް، އެފަދަ މައްސަލަތައް ބަލައި އެކަށީގެންވާ ފިޔަވަޅު އެޅޭ މަންޒަރެއް ނުފެންނަ ކަމަށް ވެސް ފާހަގަކުރެވެއެވެ.
މި ނިންމުމާއެކު، ސަރުކާރުގެ ކުންފުނިތަކުގައި ކޮރަޕްޝަންގެ މައްސަލަތަކާ ގުޅިގެން އަޅާ ފިޔަވަޅުތައް ހަރުދަނާވެ، އެފަދަ އަމަލުތައް މަދުވާނެ ކަމަށް އުންމީދު ކުރެވެއެވެ.
Advertisement
This content is created and paid for by advertisers and does not involve Voice Journalists
