ޕްރޮސެކިއުޓާ ޖެނެރަލްގެ މަގާމުން ހުސެއިން ޝަމީމް ވަކިކުރުމަށް މަޖިލީހުގެ ތަޅުމަށް ހުށަހަޅަން މަޖިލީހުގެ ޖުޑިޝަރީ ކޮމިޓީން ފާސްކޮށްފި އެވެ.
އެ މައްސަލަ މަޖިލީހުގެ ޖުޑީޝަރީ ކޮމިޓީއަށް ހުށަހެޅީ ރައްޔިތުންގެ މަޖިލީހުގެ ވެރިކަންކުރާ ޕީއެންސީގެ މެންބަރު ހުޅުދޫ ދާއިރާގެ މެންބަރު މުހައްމަދު ޝާހިދެވެ.
ޝާހިދު ވަނީ ޝަމީމް ވަކިކުރަން ޖެހޭ 8 ސަބަބެއް ބަޔާންކޮށް 7 ސޮފްހާގެ ސިޓީއެއް ކޮމިޓީއަށް ފޮނުއްވައިފަ އެވެ.
އެ މައްސަލަ މިއަދު ބޭއްވި ޖުޑިޝަރީ ކޮމިޓީގެ ބައްދަލުވުމުގައި ބަލައި، ޝަމީމްގެ އިތުބާރު ނެތްކަމުގެ މައްސަލަ ފަށަން ކޮމިޓީގެ މެންބަރުންގެ އަގުލަބިއްޔަތުން ވަނީ ފާސްކޮށްފަ އެވެ.
ޝަމީމް ޕީޖީގެ މަގާމުން ވަކިކުރުމަށް މަޖިލީހުގެ ތަޅުމަށް ހުށަހަޅަން މަޖިލީހުގެ ޖުޑިޝަރީ ކޮމިޓީން މިއަދު ނިންމާފައި މިވަނީ އޭނާ މަގާމުން ޝަމީމް ވަކިކުރުމަށް ގޮވާލާ މަޖިލިސް ކައިރީ އާންމުން މުޒާހަރާވެސް ކޮށްފައިވަނިކޮށެވެ.
ޝަމީމް ޕީޖީގެ މަގާމަށް އައްޔަންކޮށްފައިވަނީ ނިމިދިޔަ އެމްޑީޕީ ސަރުކާރުގަ އެވެ. އޭނާ އެ މަގާމަށް އައްޔަން ކުރީ ޑިސެމްބަރު 8، 2019 ގަ އެވެ. ޝަމީމްގެ ފަސް އަހަރުގެ ދައުރު ހަމަވާނީ މިއަހަރުގެ ޑިސެމްބަރަށެވެ.
Advertisement
This content is created and paid for by advertisers and does not involve Voice Journalists
