ދިރުވާލައިގެން ހަށިގަނޑުގެ ތެރޭގައި ފޮރުވައިގެން ރާއްޖެއަށް މަސްތުވާތަކެތި އެތެރެކުރަން އުޅުނު ބިދޭސީއަކު ވެލާނާ އިންޓަނޭޝަނަލް އެއާޕޯޓުން ހައްޔަރުކޮށްފިއެވެ.

ހައްޔަރުކުރެވުނު މީހާއަކީ ގާނާގެ ރައްޔިތެއް ކަމަށްވާ 56 އަހަރުގެ އައްޕިއަހް ޖޭމްސްއެވެ. އޭނާގެ ހަށިގަނޑުގައި މަސްތުވާތަކެތި ފޮރުވައިގެން އުޅޭކަމަށް ތުހުމަތު ކުރެވިގެން އައިޖީއެމްއެޗްއަށް ގެންގޮސް ސްކޭންކުރުމުން އޭނާގެ ހަށިގަނޑުގެ ތެރޭގައި "ފޮރިން ބޮޑީސް" ހުރިކަން ޔަޤީންކުރެވުނެވެ. އަދި އެތަކެތި ޓެސްޓްކުރުމުން މަސްތުވާތަކެއްޗަށް ޕޮޒިޓިވް ވެފައިވާކަން ކްރިމިނަލް ކޯޓުން ނެރުނު އަމުރުގައި ބަޔާންކޮށްފައިވެއެވެ.

މި މައްސަލައާ ގުޅިގެން ކްރިމިނަލް ކޯޓުން ވަނީ އައްޕިއަހް ޖޭމްސް ޝަރީޢަތް ނިމެންދެން ބަންދުގައި ބެހެއްޓުމަށް އަމުރުކޮށްފައެވެ.

ފާހަގަކޮށްލެވޭ ގޮތުގައި ދާދިފަހުން ވެސް ރާއްޖެއަށް އެތެރެކުރަން އުޅުނު ގިނަ އަދަދެއްގެ ޕާޓީ ޑްރަގް އަތުލައިގަނެފައިވެއެވެ. އެ މައްސަލައިގައި ތުހުމަތުކުރެވުނު ނެދަލެންޑްގެ މީހަކު 15 ދުވަހުގެ މުއްދަތަކަށް ބަންދުކުރުމަށް ކޯޓުން އަމުރުކޮށްފައިވެއެވެ.

މި ހާދިސާތަކުން ދައްކުވައިދެނީ ރާއްޖެއަށް މަސްތުވާތަކެތި އެތެރެކުރުމަށް އެކި ގޮތްގޮތުން މަސައްކަތްކުރަމުންދާކަމާއި، ކަމާބެހޭ ފަރާތްތަކުން މިފަދަ ޢަމަލުތައް ހުއްޓުވުމަށް އެކަށީގެންވާ ރަނގަޅު މަސައްކަތްތަކެއް މިހާރު ކުރެވެމުންދާކަމެވެ.