އިޓަލީއަށް ނިސްބަތްވާ 13 އަސްކަރީ މަތިންދާބޯޓު ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ޖައްސައިފިއެވެ.
މައުލޫމާތު ލިބިފައިވާގޮތުގައި، ނަގަންޖެހޭ ހުއްދަތައް ނަގައިގެން ޓެކްނިކަލް ސްޓޮޕެއްގައި ވީއައިއޭގައި ގައި މި ބޯޓުތައް ޖައްސާފައިވަނީ މިއަދު ހެނދުނުގެ ވަގުތެއްގައިއެވެ.
މިކަމާއި ގުޅިގެން އެއާޕޯޓުގެ އިސް އޮފިޝަލަކު ވިދާޅުވީ އެ އުޅަނދުތައް ވީއައިއޭ އަށް ޖެއްސީ ރީފިލް ކުރުމަށް ކަމަށާއި، އެ ބޯޓުތައް ދެން ދަތުރުކުރުމަށް ހަމަޖެހިފައިވަނީ މެލޭޝިއާއަށް ކަމަށެވެ.
އެހެންނަމަވެސް، ރާއްޖެ އިން ބޯޓުތައް ފުރާނެ ވަގުތެއް އަދި ސާފުވެފައެއް ނުވެއެވެ.
މިކަން ކަށަވަރުކޮށްދެއްމުން އެމްއެންޑީއެފުން ވެސް ބުނީ އެއީ ޓެކްނިކަލް ސްޓޮޕަކަށް ރާއްޖެ އައި އިޓަލީ ޖެޓުތަކެއް ކަމަށެވެ.
މިދިޔަ މަހު ވެސް އިޓަލީގެ ހަތަރު "ޔޫރޯފައިޓާ ޓައިފޫން" މަރުކާގެ ފައިޓަރު ޖެޓާއި އެއް ސަޕޯޓު އެއާކްރާފް ރާއްޖެ އައިސްފައިވާއިރު، މިދިޔަ އަހަރުގެ ތެރޭގައި ވެސް ފަސްވަނަ ޖެނެރޭޝަނުގެ ޖެޓުތަކެއް ކަމަށްވާ "އެފް-35 ލައިޓްނިން" މަރުކާގެ ޖެޓުތަކެއް ދެފަހަރެއްގެ މަތިން ވީއައިއޭގައި ޖައްސާފައިވާކަން ފާހަގަކޮށްލަން ޖެހެއެވެ.
މިއީ ދަތުރުގެ މެދުން ތެޔޮ އެޅުމަށްޓަކައި ޓްރާންސިޓް ބޭނުމުގައި ރާއްޖޭގައި ނަގަން ޖެހޭ ހުއްދަތައް ނަގައިގެން ޖައްސާ ޖެޓުތަކެކެވެ.
Advertisement
This content is created and paid for by advertisers and does not involve Voice Journalists
