ރާއްޖޭގައި ބޮޑުވެފައިވާ ގޭންގު ކުށްތައް ހުއްޓުވުމަށްޓަކައި، ގޭންގުތަކުގެ ބާރު ކަނޑުވާލުމަށް އަމާޒުކޮށްގެން އާ ބިލެއް ހޯމް މިނިސްޓްރީން އެކުލަވާލައިފިއެވެ. "ގޭންގު ކުށްތައް ހުއްޓުވުމުގެ ގާނޫނު" ގެ ނަމުގައި އެކުލަވާލާފައިވާ މި ބިލް މިހާރު ވަނީ ރައްޔިތުންގެ މަޖިލީހަށް ފޮނުވުމަށްޓަކައި އެޓަރނީ ޖެނެރަލްގެ އޮފީހަށް ފޮނުވާފައެވެ.
މި ބިލުގައި ގޭންގެއް ކަމުގައި ކަނޑައަޅާނެ މިންގަނޑުތަކާއި، ގޭންގު ކުށްތަކުން ހޯދާ މުދަލާއި ފައިސާ ދައުލަތަށް ނެގުމާއި، ގޭންގު ކުށްތަކަށް ކަނޑައެޅޭ އަދަބުތައް ހިމެނެއެވެ. އޭގެ އިތުރުން، ގޭންގު މެންބަރުންނަށް ދައުލަތުގެ ވަޒީފާ ނުދިނުމާއި، އިންތިޚާބީ މަޤާމުތަކުން ވަކިކުރުމާއި، އެފަދަ މަޤާމުތަކަށް ކުރިމަތިނުލެވުން ފަދަ ކަންކަން ވެސް ހިމަނާފައިވެއެވެ.
ބިލުގައިވާ ގޮތުން، ގޭންގު މެންބަރެއްކަން ކަނޑައަޅާނީ ޚާއްޞަ ކޮމިޓީއަކުންނެވެ. އަދި ގޭންގު މެންބަރެއް ކަމަށް ކަނޑައެޅޭ މީހަކު ދައުލަތުގެ ވަޒީފާއެއްގައި ހުރިނަމަ، އެ މީހަކު ވަކިކުރަންޖެހޭނެއެވެ. އިންތިޚާބީ މަޤާމެއްގައި ހުރި މީހަކު ގޭންގު މެންބަރެއް ކަމަށް ކަނޑައެޅިއްޖެނަމަ، އެ މަޤާމު ގެއްލޭނެކަމަށްވެސް ބިލުގައި ބަޔާންކޮށްފައިވެއެވެ.
މީގެ އިތުރުން، ފުލުހުންނަށް އިތުރު ބާރުތަކެއް ދިނުމާއި، ގޭންގު ކުށްތަކަށް ހަރުކަށި އަދަބުތަކެއް ކަނޑައެޅުން ވެސް ބިލުގައި ހިމަނާފައިވެއެވެ. މިސާލަކަށް، ގޭންގަކަށް ނިސްބަތްވާ ނިޝާނެއް ނުވަތަ ލޯގޯއެއް ތަނެއްގައި ކުރެހުމަކީ ކުށެއް ކަމަށް ކަނޑައަޅައި، އޭގެ އަދަބަކީ 6 މަހާއި 18 މަހާ ދެމެދުގެ މުއްދަތަކަށް ޖަލަށްލުން ކަމަށް ބަޔާންކޮށްފައިވެއެވެ.
މި ބިލަކީ ރާއްޖޭގައި އިތުރުވަމުންދާ ގޭންގު ކުށްތައް ހުއްޓުވުމަށް އެޅޭ މުހިންމު ފިޔަވަޅެއްގެ ގޮތުގައި ސަރުކާރުން ދެކެއެވެ. އެހެންނަމަވެސް، ބިލުގައި ހިމެނޭ ބައެއް މާއްދާތަކާ ގުޅޭގޮތުން ޤާނޫނީ ފަންނުގެ ބައެއް ފަރާތްތަކުން ކަންބޮޑުވުން ފާޅުކޮށްފައިވާކަން ފާހަގަކުރެވެއެވެ.
Advertisement
This content is created and paid for by advertisers and does not involve Voice Journalists
