އިޒްރޭލުން ޣައްޒާގައި ހިންގަމުންދާ ގަތުލުއާންމުގައި ޝަހީދުކޮށްލި މީހުންގެ އަދަދު 40،000 އާ ކައިރިވެއްޖެއެވެ.

އެންމެ ފަހުގެ ތަފާސްހިސާބުތަކުން ދައްކާ ގޮތުގައި މިހާތަނަށް 39،965 މީހުން ވަނީ އެ ހަމަލާތަކުގައި ޝަހީދުވެފައެވެ. އަދި 92،294 މީހުން ވަނީ ޒަޚަމްވެފައެވެ.

އިއްޔެ އެކަނިވެސް ފަލަސްތީނުގެ 36 މީހުން އިޒްރޭލުގެ ހަމަލާތަކުގައި މަރުވިއެވެ. މިއަދު ހެނދުނު އިތުރު 20 މީހުން މަރުވެފައިވާކަމަށް ވަނީ ރިޕޯޓުކޮށްފައެވެ. މީގެ އިތުރުން، އޮކިއުޕައިޑް ވެސްޓް ބޭންކުގެ ޓުބާސް ގަވަނޯރޭޓްގައި ހިންގުނު އިޒްރޭލީ ރެއިޑްތަކުގައި 5 މީހުން މަރުވިއެވެ. އޭގެ ތެރެއިން 4 މީހުން މަރުވީ ތަންމޫން ރަށުގައި ޑްރޯނަކުން ދިން ހަމަލާއެއްގައެވެ.

Advertisement

އދ. ގެ ހިއުމެނިޓޭރިއަން އޭޖެންސީން ސެކިއުރިޓީ ކައުންސިލަށް އަންގާފައިވާ ގޮތުގައި ޣައްޒާ ސިޓީގެ ސްކޫލަކަށް ދިން ހަމަލާއެއްގައި މަދުވެގެން 100 މީހުން މަރުވި ހާދިސާއަކީ "އެކަހެރި ހާދިސާއެއް" ނޫންކަމަށާއި ސްކޫލުތަކަށް ދޭ ހަމަލާތައް ދަނީ "އިތުރުވަމުން"ނެވެ.

މިއާއެކު، އިޒްރޭލުގެ ސިފައިންވަނީ ހަނގުރާމައިގެ ވޭންތަކަށް ހުށަހެޅިފައިވާ ހާން ޔޫނިސްގެ އިތުރު ސަރަޙައްދުތަކުން ވަގުތުން ފަލަސްތީނުގެ ރައްޔިތުން ނިކުތުމަށް އަމުރުކޮށްފައެވެ. އެ ސަރަޙައްދުތަކުގައި ވަރުގަދަ ހަމަލާތަކެއް ދިނުމަށް ތައްޔާރުވަމުންދާ ކަމަށް އިޒްރޭލުގެ ސިފައިން ބުނެފައިވެއެވެ.