ފީފާގެ ބެޖް ހާސިލްކުރި ފުރަތަމަ ދިވެހި ރެފްރީ "މައްލާ ޅަތުއްތު" މިއަދުގެ ވަގުތެއްގައި އަވަހާރަވެއްޖެއެވެ.

ވޮއިސްއަށް މައުލޫމާތު ހިއްސާކުރަމުން މައްލާ ޅަތުއްތު އަވަހާރަވެފައިވަނީ އިންޑިއާގެ ޓްރިވެންޑްރަމް ހަސްފަތާލެއްގައި ފަރުވާ ހޯއްދަވަމުން ގެންދަވަނިކޮށް މިއަދު މެންދުރުގެ ވަގުތެއްގައެވެ. 

މައްލާއަކީ ރާއްޖޭގެ ކުރީގެ އެއްވަނަ ރެފްރީއެވެ. މައްލާ ވަނީ އެންމެ މަތީ ހަރުފަތުގައި 1995 ވަނަ އަހަރާ ހަމަޔަށް ރެފްރީކަންކޮށްފައެވެ. 

Advertisement

މައްލާ ޅަތުއްތު ފުޓްބޯޅަ ކުޅުއްވަން ފަށްޓަވާފައިވަނީ މަދަރުސީ ދައުރުގައެވެ. އޭގެފަހުން 1969 ވަނަ އަހަރުން ފެށިގެން ޤައުމީ ފެންވަރުގައި ކުޅުއްވަން ފެށްޓެވިއެވެ. އޭނާ ވަނީ މާލޭ ޓެނިސް ކުލަބަށާއި އަދި ފަހުން މޫން ސްޕޯޓްސް ކުލަބަށް ފުލްބެކްގެ މަގާމުގައި ޤައުމީ ފުޓްބޯޅަ މުބާރާތްތަކުގައި ކުޅުއްވާފައެވެ. މައްލާ ރެފްރީއެއްގެ ގޮތުގައި ފެންނަން ފެށީ 1969 ވަނަ އަހަރުން ފެށިގެންނެވެ.

މައްލާ ވަނީ ދައުލަތަށް 43 އަހަރަށްވުރެ ގިނަ ދުވަހު ހިދުމަތްކުރައްވާފައެވެ. މައްލާ ޅަތުއްތު، އެންމެ ފުރަތަމަ ސަރުކާރުގެ ޚިދުމަތަށް ނުކުމެވަޑައިގަތީ، އުމުރުން 16 އަހަރުގައި، 1964 ވަނަ އަހަރު، ސިފައިންގެ މީހެއްގެ ވަޒީފާއަށެވެ. އޭގެފަހުން އޭނާ ވަނީ ހޯމް އެފެއާޒްގެ ރަޖިސްޓްރޭޝަން ޑިވިޜަންގެ އިނގިރޭސި ކާތިބުކަމާއި، ކުޅިވަރާބެހޭ ބައިގެ ސެކްރެޓެރީކަން ކުރައްވާފައެވެ.

ދިވެހި ކުޅިވަރުގެ ތަރައްޤީއަށް މައްލާ ވަނީ 52 އަހަރު އަގުހުރި ޚިދުމަތްތަކެއް ކުރައްވައިފައެވެ. މައްލާ ޅަތުއްތުއަށް ވަނީ ކުޅިވަރުގެ ރޮނގުން 1990 ވަނަ އަހަރު އާންމު ޚިދުމަތުގެ ހިތްވަރު ދިނުމުގެ އިނާމު އަދި 2021 ވަނަ އަހަރު ޝަރަފުވެރިކަމުގެ ޤައުމީ އިނާމު ހޯއްދަވާފައެވެ. މީގެ އިތުރުން އޭނާ ވަނީ 2021 ވަނަ އަހަރު ޝަރަފްވެރިކަމުގެ އިނާމްވެސް ހޯއްދަވާފައެވެ.