ކުރީގެ ސަރުކާރުގެ ފޮރިން މިނިސްޓަރު އަބްދުﷲ ޝަހީދުގެ އަނބިކަނބަލުން ޒިފްލީނާ ހަސަން، ހުޅުމާލެއިން 3.5 މިލިއަން ރުފިޔާއަށް ފްލެޓެއް ގަތް މައްސަލައިގެ ތަޙްޤީޤު ނިންމައި، ދަޢުވާކުރުމާމެދު ގޮތެއް ނިންމުމަށް އެންޓި-ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓަރ ޖެނެރަލްގެ އޮފީހަށް ފޮނުވުމަށް ނިންމައިފިއެވެ.
އޭސީސީގެ އިންފޮމޭޝަން އޮފިސަރު ބައެއް މީޑިއާ އަށް މަޢުލޫމާތު ދެއްވަމުން ވިދާޅުވީ، މި މައްސަލައިގެ ތަޙްޤީޤު ނިމި، ދަޢުވާކުރުމާމެދު ގޮތެއް ނިންމުމަށް ޕީޖީ އޮފީހަށް ފޮނުވުމަށް ނިންމާފައިވާ ކަމަށެވެ. ނަމަވެސް އިތުރު ތަފްސީލެއް އޭނާ ހާމަކުރައްވާފައެއް ނުވެއެވެ.
ކުރީގެ ސަރުކާރުގައި ޖެންޑަރ މިނިސްޓްރީގެ ސްޓޭޓް މިނިސްޓަރުކަން ވެސް ކުރައްވާފައިވާ ޒިފްލީނާގެ މި މައްސަލަ ދިވެހި ފުލުހުންގެ ޚިދުމަތުން އޭސީސީއަށް ފޮނުވާފައިވަނީ މިދިޔަ މަހުގެ 14 ވަނަ ދުވަހުއެވެ.
މީގެ އިތުރުން، ޒިފްލީނާގެ ދަރިފުޅު އައިޝަތު މިސްކްގެ ނަމުގައި ވެސް ހުޅުމާލެއިން 3.8 މިލިއަން ރުފިޔާގެ ފްލެޓެއް ގަނެފައިވާ މައްސަލައެއް ފެންމަތިވެފައިވެއެވެ. މި ފްލެޓަކީ އާރްސީސީއިން ހުޅުމާލޭގައި ތަރައްޤީކުރި ބްލޫ ހެވަން ރެސިޑެންސްއިން ގަނެފައިވާ ފްލެޓެކެވެ.
Advertisement
This content is created and paid for by advertisers and does not involve Voice Journalists
