ލަންކާގެ ރިޔާސީ އިންތިޚާބުގައި ރެކޯޑު އަދަދެއްގެ ކެންޑިޑޭޓުން ވާދަކުރައްވައްވާކަން ލަންކާގެ މީޑިއާތަކުން ހާމަކޮށްފިއެވެ. 

ސްރީލަންކާގެ އިލެކްޝަންސް ކޮމިޝަނާ ހަވާލާދީ ލަންކާގެ މީޑިއާތަކުން ހާމަކޮށްފައިވާ ގޮތުގައި، އަންނަ މަހު ބޭއްވުމަށް ހަމަޖެހިފައިވާ އެ ގައުމުގެ ރިޔާސީ އިންތިޚާބުގައި ވާދަކުރެއްވުމަށް 39 ކެންޑިޑޭޓުން ވަނީ ކުރިމަތިލައްވާފައެވެ.

އިލެކްޝަންސް ކޮމިޝަނުގެ ޗެއަރމަން އާރްއެމްއޭއެލް ރަތުނަޔަކަ ވިދާޅުވި ގޮތުގައި، މި އިންތިޚާބުގައި ވާދަކުރެއްވުމަށް ހުށަހެޅުނު 39 އެޕްލިކޭޝަން ވެސް ވަނީ ބަލައިގެންފައެވެ.

މި އިންތިޚާބު ބޭއްވުމަށް ހަމަޖެހިފައިވަނީ އަންނަ ސެޕްޓެމްބަރު މަހުގެ 21 ވަނަ ދުވަހުއެވެ. އަދި މި އިންތިޚާބުގައި 17 މިލިއަނަށް ވުރެ ގިނަ މީހުންނަށް ވޯޓުލުމުގެ ޙައްޤު ލިބިގެންވެއެވެ.

2019 ވަނަ އަހަރު ބޭއްވުނު ރިޔާސީ އިންތިޚާބުގައި 35 ކެންޑިޑޭޓުން ވާދަކުރެއްވި އިރު، މިފަހަރުގެ އިންތިޚާބުގައި ރެކޯޑު އަދަދެއްގެ ކެންޑިޑޭޓުން ވާދަކުރައްވާކަން ފާހަގަކުރެވެއެވެ.

ކަމާ ބެހޭ މާހިރުންގެ ލަފާގައި، ލަންކާގެ އިޤްތިޞާދު ހަމައަކަށް އެޅުވުމަށްޓަކައި ތަންފީޛުކުރާނެ ކަންކަމާއި ސިޔާސަތުތައް ބައްޓަންކުރެވޭނީ އިންތިޚާބު ކާމިޔާބުކުރާ ކެންޑިޑޭޓެއް ކަނޑައެޅުމުންނެވެ.

2022 ވަނަ އަހަރު ލަންކާގެ އިޤްތިޞާދު ދަށަށް ގޮސް، ގައުމުގެ ހާލަތު ވަރަށް ބޮޑަށް ގޯސްވިއެވެ. އޭރުގެ ސަރުކާރުގެ ދޯދިޔާ ސިޔާސަތުތަކުގެ ސަބަބުން، އައިއެމްއެފް އާއި އިންޑިއާ އަދި އެހެނިހެން ގައުމުތަކުން މާލީ އެހީ ލިބުނު ނަމަވެސް، ގޮޓަބަޔާ ރާޖަޕަކްސާގެ ސަރުކާރަށް ހާލަތު ކޮންޓްރޯލްކުރަން ނޭނގުނެވެ. މިކަމުގެ ސަބަބުން ރައްޔިތުންގެ އިތުބާރު ސަރުކާރަށް ގެއްލި، މުޒާހަރާތައް ފެށުނެވެ. އަދި ރިޔާސީ ގަނޑުވަރަށް ރައްޔިތުން ވަދެގަތުމާ ގުޅިގެން ގޮޓަބަޔާ އިސްތިއުފާ ދެއްވިއެވެ.

ގޮޓަބަޔާ އިސްތިއުފާދެއްވުމުން އެ ގައުމުގެ ކުރީގެ ބޮޑުވަޒީރު ރަނިލްވިކްރަމަ ސިންހަ ވަގުތީ ރައީސެއްގެ ގޮތުން ބާރުތަކާއި ހަވާލުވެވަޑައިގެންނެވިއެވެ. އަދި އެ ގައުމުގެ މަޖިލީހުން ރަނިލް ރައީސް ކަމަށް އައްޔަންކުރިއެެވެ.

ފާއިތުވީ ދެއަހަރު ލަންކާގެ އިޤްތިސާދު ރަނގަޅު ކުރުމަށްޓަކައި އެ ގައުމުގެ ސަރުކާރުން ދަނީ ގިނަ މަސައްކަތްތަކެއް އައިއެމްއެފުގެ އެހީއާއެކީ ކުރަމުންނެވެ