ޣައްޒާގައި ކޮންމެ ދުވަހަކު އެވްރެޖްކޮށް ގާތްގަޑަކަށް 130 މީހުން މަރުވަމުންދާކަމަށް އދ. އިން ބުނެފިއެވެ.

ޣައްޒާ ސިޓީގައި ދިގުދެމިގެންދާ އިސްރާއީލީ އަނިޔާވެރިކަން އދ. ގެ އިންސާނީ ޙައްޤުތަކާބެހޭ ކޮމިޝަނަރު ވޯލްކާ ޓާރކް ވަނީ ކުށްވެރިކޮށްފައެވެ. އަދި އޮކްޓޯބަރު 7 އިން ފެށިގެން ކޮންމެ ދުވަހަކު ގާތްގަނޑަކަށް 130 މީހުން މަރުވަމުންދާކަމަށް އޭނާ ވަނީ ހާމަކޮށްފައެވެ.

ބުރާސްފަތި ދުވަހު ދެއްކެވި ވާހަކަފުޅުގައި ޓާރކް ވިދާޅުވީ، ވޭތުވެދިޔަ 10 މަސް ދުވަހުގެ ތެރޭގައި ކޮންމެ ދުވަހަކު އެވްރެޖްކޮށް 130 މީހުން މަރުވަމުންދާކަމަށެވެ. އަދި އިސްރާއީލީ ސިފައިން ގެދޮރާއި، ހޮސްޕިޓަލްތަކާއި، ސްކޫލްތަކާއި އަދި އަޅުކަންކުރާ ތަންތަން ބިމާ ހަމަކޮށް ސުންނާފަތި ކޮށްލާފައިވާ މިންވަރު ވަރަށް ބޮޑަށް ހައިރާންކުރުވާކަމަށް އޭނާ ވިދާޅުވިއެވެ.

ޣައްޒާގައި މިހާރު ކުރިމަތިވެފައިވާ "ހިތަށްނުގެނެވޭފަދަ" ހާލަތަކީ އިސްރާއީލީ ސިފައިން ހަނގުރާމައިގެ ގަވާއިދުތަކާ ޚިލާފުވުމުގެ ސަބަބުން ދިމާވެފައިވާ ކަމެއްކަމަށް ޓާރކް ވަނީ ފާހަގަކުރައްވާފައެވެ. އަދި އިންސާނީ ޤާނޫނުގެ ދަށުން އާންމު ރައްޔިތުންނާއި އާންމުންގެ މުދަލާއި އިންފްރާސްޓްރަކްޗަރ ރައްކާތެރިކުރުމުގެ މުހިންމުކަން އޭނާ ވަނީ ފާހަގަކުރައްވާފައެވެ.

ބައިނަލްއަޤްވާމީ މުޖުތަމަޢުއަށް ގޮވާލައްވަމުން ޓާރކް ވިދާޅުވީ، ހުރިހާ ފަރާތްތަކުން ވެސް ވަގުތުން ހަނގުރާމަ ހުއްޓާލައި، ހަތިޔާރު ބަހައްޓައި، މީހުން މެރުން ހުއްޓާލުމަށެވެ. އަދި ރަހީނުން ދޫކޮށްލައި، ކުށެއްނެތި ހައްޔަރުކޮށްފައިވާ ފަލަސްޠީނު މީހުން މިނިވަންކުރުމަށާއި، އިސްރާއީލުގެ ޣައިރު ޤާނޫނީ އޮކިއުޕޭޝަން ނިމުމަކަށް ގެނެސް، ބައިނަލްއަޤްވާމީ ގޮތުން އެއްބަސްވެފައިވާ ދެ ދައުލަތުގެ ހައްލު ޙަޤީޤަތަކަށް ހެދުމަށް އޭނާ ގޮވާލެއްވިއެވެ.

މިދިޔަ އަހަރުގެ އޮކްޓޯބަރު މަހުގެ 7 ވަނަދުވަހުން ފެށިގެން އިސްރާއީލުން ދެމުންދާ ހަމަލާތަކުގައި މިހާތަނަށް 40،000 އަށްވުރެ ގިނަމީހުން ޣައްޒާއިން ޝަހީދުވެފައިވާއިރު، އޭގެތެރޭގައި ގިނައީ އަންހެނުންނާ ކުޑަކުދިންކަމަށް އދ.ގެ ރިޕޯޓްތަކުން ދައްކައެވެ.