“ގްލޯބަލް ދައުވާ ޑޭ” ނުވަތަ ދައުވާ ދިނުމުގެ ބައިނަލް އަޤުވާމީ ދުވަސް ރާއްޖޭގައި ފާހަގަ ކުރުމަށް، ޣައިރު ދީން ތަކުގެ ފަތުރުވެރިންނަށް އިސްލާމްދީނާއި ގުޅޭ ޞައްޙަ މަޢުލޫމާތު ފޯރުކޮށްދިނުމަށް ޚާއްސަ ހަރަކާތެއް ހުޅުމާލޭގައި ކުރިއަށް ގެންގޮސްފިއެވެ.
ރާއްޖޭގައި، ޣައިރު މުސްލިމުންނަށް ދައުވާގެ އެކި ހަރަކާތް ކުރިއަށް ގެންދިޔުމުގެ ކަންކަން ރާވައި ހިންގުމުގައި އިސްވެ މަސައްކަތް ކުރާ “ޓީމް ދައުވާ މޯލްޑިވްސް” (ޓީޑީއެމް) އިން މި ހަރަކާތް އިއްޔެ ހަވީރު 16:30 އިން ފެށިގެން ކުރިއަށް ގެންގޮސްފައިވަނީ، ހުޅުމާލޭ ބީޗު ސަރަހައްދުގައެވެ.
ޓީޑީއެމް އިން ބުނެފައިވާ ގޮތުން މި ހަރަކާތް ކުރިއަށް ގެންގޮސްފައިވަނީ ޔޫތްޔޫނިއަން އާއި ގުޅިގެންނެވެ.
ހުޅުމާލޭގައި ބޭއްވުނު ދައުވާ ހަރަކާތުގެ ތެރެއިން: ފޮޓޯ/ ޓީޑީއެމް
މި ހަރަކާތުގެ ތެރެއިން، ބީޗް ސަރަހައްދުގައި އެވަގުތު އުޅުނު ފަތުރުވެރިންނަށާއި، އެ ސަރަހައްދު ހުރި ކެފޭ ފަދަ ތަންތަނުގައި މަސައްކަތް ކުރާ ޣައިރު ދީން ތަކުގެ މީހުންނަށް ކީރިތި ޤުރުޢާނުގެ ތަރުޖަމާ ބަހާފައިވެއެވެ.
އަދި އިސްލާމް ދީނާމެދު އެމީހުންގެ ހިތުގައި ހުރި ސުވާލު ތަކަށް ޖަވާބުދީ ކަންކަން އޮޅުންފިލުވައިދެވިފައުވާ ކަމަށްވެސް ޓީޑީއެމް އިން ބުނެފައިވެއެވެ.
ހުޅުމާލޭގައި ބޭއްވުނު ދައުވާ ހަރަކާތުގެ ތެރެއިން: ފޮޓޯ/ ޓީޑީއެމް
ޓީމް ދައުވާ މޯލްޑިވްސް އިން މީގެ ކުރިންވެސް މިސްކިތް ތަކުގަޔާއި މަގުތަކުގައިވެސް ޣައިރު މުސްލިމުންނަށް ދައުވާ ދިނުމުގެ ހަރަކާތްތައް ކުރިއަށް ގެންގޮސްފައި ވެއެވެ.
މީގެ އިތުރުން ކޮންމެ ރޯދަމަހަކުވެސް، ރޯދަވީއްލަން ގެއަށް ނުވަތަ މިސްކިތަށްވެސް ނުދެވިފައި ތިބޭ މީހުންނަށް ރޯދަވީއްލުން އަވަސްކޮށްދިނުމުގެ ގޮތުން މަގުމަތިން ރޯދަވީއްލުން ފޯރުކޮށްދިނުމުގެ ކަންކަން ކުރިއަށް ގެންދެއެވެ.
Advertisement
This content is created and paid for by advertisers and does not involve Voice Journalists
