މަސްތުވާތަކެތީގެ ތުހުމަތުކުރެވުނު އައިޖީއެމްއެޗްގެ ނަރުސް, ވަޒީފާއިން ސަސްޕެންޑްކޮށްފިއެވެ.

އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އަންހެން ނަރުހަކު މަސްތުވާތަކެތި ބޭނުންކުރާކަމަށް ތުހުމަތުކުރެވި ވަޒީފާއިން ސަސްޕެންޑްކޮށްފައިވާ ކަމަށް އެ ހޮސްޕިޓަލުން ވަނީ ހާމަކޮށްފައެވެ.

އައިޖީއެމްއެޗްގެ މީޑިއާ އޮފިޝަލް މަޢުލޫމާތު ދެއްވިގޮތުގައި، މި މައްސަލަ ވަނީ ފުލުހުންނަށް ރިޕޯޓުކޮށްފައެވެ. އަދި މިހާރު ފުލުހުން ދަނީ މައްސަލަ ތަޙުޤީޤުކުރަމުންނެވެ.

Advertisement

ތުހުމަތު ކުރެވިފައިވާ ނަރުހަކީ ކުރިން ވޯޑު އިންޗާޖެއްގެ މަޤާމުގައި ހުރި މުވައްޒަފެއްކަމަށާއި، ނަމަވެސް މަސައްކަތުގެ ފެންވަރަށް ބަލައި އޭނާގެ މަޤާމު ވަނީ ދަށްކޮށްފައިކަމަށް މީޑިއާ އޮފިޝަލް އިތުރަށް ވިދާޅުވިއެވެ.

ފުލުހުން މަޢުލޫމާތު ދެއްވިގޮތުގައި، މި މައްސަލަ އެ މުއައްސަސާއަށް ރިޕޯޓުކުރެވުނީ ގާތްގަނޑަކަށް ދެ ހަފްތާއެއްހާ ދުވަސް ކުރިންނެވެ. އަދި މައްސަލަ ރިޕޯޓުކުރީ އައިޖީއެމްއެޗުންކަމަށްވެސް ފުލުހުން ފާހަގަކުރެއްވިއެވެ.