ތައިލޭންޑްގެ ބޮޑުވަޒީރުކަމަށް އައްޔަންކުރެވުނު ޕައެޓޮންގްޓާން ޝިނަވަޓްރާ އަށް ރައީސް މުޙައްމަދު މުޢިއްޒު ތަހުނިޔާ ފޮނުއްވައިފިއެވެ. ޕައެޓޮންގްޓާން ޝިނަވަޓްރާ އަކީ ތައިލޭންޑްގެ ތާރީޚުގައި އެންމެ ޒުވާން ބޮޑުވަޒީރެވެ.
ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ޕައެޓޮންގްޓާން ޝިނަވަޓްރާގެ ހުނަރުވެރި ލީޑަރޝިޕްގެ ދަށުން ތައިލޭންޑް އައު ފާގަތިކަމެއްގެ ޒަމާނަކަށް ވަދެގެންދާނެ ކަމަށް އުންމީދުކުރައްވާ ކަމަށެވެ.
މީގެއިތުރުން، ރާއްޖެއާއި ތައިލޭންޑާ ދެމެދު އޮތް ގާތް ރަޙްމަތްތެރިކަމާއި އެކުވެރިކަން އިތުރަށް ބަދަހިކުރުމަށް އެކުގައި މަސައްކަތްކުރުމަށް އުންމީދުކުރައްވާ ކަމަށްވެސް ރައީސް މުޢިއްޒު ވިދާޅުވެފައިވެއެވެ.
އުމުރުފުޅުން 37 އަހަރުގައި އެކަމަނާ ވެގެންދާނީ އެގައުމުގެ އެންމެ ޒުވާން ބޮޑުވަޒީރަށެވެ. އަދި ބޮޑުދައިތަ ޔަންގްލަކްއަށް ފަހު އެ މަގާމަށް އިންތިހާބުވި ދެވަނަ އަންހެން ބޭކަނބަލަށެވެ.
ތައިލެންޑްގެ ގާނޫނު ހަދާ މަޖިލީހުން ޕައެޓްންގްޓާން ޝިނަވަޓްރާ އެ މަގާމަަށް އިންތިހާބުކޮށްފައިވަނީ އެ ގައުމުގެ އެންމެ މަތީ ކޯޓުން ކުރި ހުކުމަކާ ގުޅިގެން އެގައުމުގެ ބޮޑުވަޒީރު ސެތާ ތަވިސިން މަގާމުން ވަކިކުރުމާއި ގުޅިގެން އެ މަޖިލީހުން ނެގި ވޯޓަކުންނެވެ.
ތައިލެންޑް ގާނޫނު ހަދާ މަޖިލީހުގައި ތިއްބަވާ 493 މެންބަރުންގެ ތެރެއިން ޕައިޓޮންގްޓާން އަށް ވަނީ 319 ވޯޓު ލިބިވަޑައިގެންފައެވެ.
ޕައެޓްންގްޓާން އަކީ ތައިލެންޑްގެ ކުރީގެ ބޮޑުވަޒީރު އަދި ބިލިނިއާ ތަކްޝިން ޝިނަވަޓްރާގެ އެންމެ ހަނގު ދަރިކަނބަލުންނެވެ. އަދި ތައިލެންޑް ބޮޑުވަޒީރަަކަށް ވެވަޑައިގެން އެ އާއިލާގެ ހަތަރުވަނަ ބޭފުޅާއެވެ.
Advertisement
This content is created and paid for by advertisers and does not involve Voice Journalists
