ޚާރިޖީ ވަޒީރު މޫސާ ޒަމީރު މިއަދު ސައުދީ ޢަރަބިއްޔާއަށް ރަސްމީ ދަތުރުފުޅެއްގައި ވަޑައިގެންފިއެވެ. މިއީ ސައުދީ ޢަރަބިއްޔާގެ ޚާރިޖީ ވަޒީރު ޕްރިންސް ފައިސަލް ބިން ފަރްހާން އަލް-ސަޢުދުގެ ދަޢުވަތަކަށް ކުރައްވާ ދަތުރުފުޅެކެވެ.
މި ދަތުރުފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ ސިޓީއެއް ސައުދީ ރަސްގެފާނު އަދި ބޮޑުވަޒީރު ޕްރިންސް މުޙައްމަދު ބިން ސަލްމާނަށް އަރުވާނެ ކަމަށް ޚާރިޖީ ވުޒާރާއިން މަޢުލޫމާތު ދެއްވިއެވެ.
ދަތުރުފުޅުގެ ތެރޭގައި ސައުދީ ސަރުކާރުގެ އިސް ފަރާތްތަކާއި ސައުދީ ފަންޑުގެ އިސްވެރިންނާ ބައްދަލުކުރައްވައި، ދެ ޤައުމުގެ ގުޅުން ބަދަހިކުރުމާއި އެކުގައި މަސައްކަތްކުރެވިދާނެ ދާއިރާތަކާ ގުޅޭގޮތުން މަޝްވަރާކުރައްވާނެއެވެ. އަދި ރިޔާޟުގައި ދިރިއުޅޭ ދިވެހިންނާވެސް ބައްދަލުކުރެއްވުމަށް ވަނީ ހަމަޖެހިފައެވެ.
ޚާރިޖީ ވަޒީރުގެ އިތުރުން މި ދަތުރުފުޅުގައި އެމްއެމްއޭގެ ގަވަރުނަރު އަޙުމަދު މުނައްވަރު، އެމްބެސެޑަރ އެޓް ލަރޖް އަޙުމަދު ނަސީރު، އެމްއޭސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު އަދި ޚާރިޖީ ވުޒާރާގެ އިސް ބޭފުޅުން ބައިވެރިވެވަޑައިގަންނަވައެވެ.
ޚަރިޖީ ވަޒީރުގެ މި ދަތުރުފުޅަކީ 4 ދުވަހުގެ ދަތުރުފުޅެކެވެ. މިއަހަރަކީ ދިވެހިރާއްޖެއާއި ސައުދީޢަރަބިއްޔާއާއި ދެމެދު ސިޔާސީ ގުޅުން ޤާއިމުކުރިތާ 43 އަހަރު ފުރޭ އަހަރެވެ.
Advertisement
This content is created and paid for by advertisers and does not involve Voice Journalists
